نئی دہلی: راجدھانی دہلی کی ایک عدالت نے 2020 کے شمال مشرقی دہلی فسادات کے ایک معاملہ میں باپ بیٹے کو تشدد اور آتشزدگی کے لیے مجرم قرار دیا ہے۔ عدالت نے اپنا فیصلہ سناتے ہوئے کہا کہ استغاثہ نے ان کے خلاف بلاشبہ الزامات ثابت کیے ہیں۔ مجرم ٹھہرائے گئے متھن سنگھ اور اس کے بیٹے جانی کمار کے خلاف معاملہ کی سماعت ایڈیشنل سیشن جج (اے ایس جے) پولتسے پرماچلا نے کی۔ دونوں پر 25 فروری 2020 کو کھجوری خاص میں لین نمبر 4 پر کئی لوگوں کی املاک کو نذر آتش کرنے اور فسادی ہجوم کا حصہ ہونے کا الزام عائد کیا گیا تھا۔جج نے کہاکہ میرے خیال میں دونوں ملزمان کے خلاف یہ بات بلا شبہ ثابت ہو گئی ہے کہ وہ اس ہجوم کا حصہ تھے جس نے شکایت کنندہ شبانہ خاتون کی املاک کو جلایا۔
