150 سے زیادہ درخواستیں خارج‘ دیگر مذہبی ٹرسٹوں کی طرح ہی کورٹ فیس ادا کرنی ہوگی‘ عدالت کا فیصلہ
احمد آباد ۔18؍ ڈسمبر (ایجنسیز) گجرات ہائی کورٹ نے کل مسلم وقف اداروں سے متعلق ایک اہم فیصلہ سناتے ہوئے تقریباً 150 درخواستوں کو خارج کردیا۔ ان درخواستوں میں وقف ٹرسٹوں نے کورٹ فیس کی ادائیگی سے چھوٹ کا مطالبہ کیا تھا۔ ہائی کورٹ کے اس فیصلے کو ریاست میں وقف املاک سے متعلق مقدمات کے لحاظ سے کافی اہم مانا جارہا ہے۔ ہائی کورٹ نے اپنے فیصلے میں صاف کہا ہے کہ قانون کی نظر میں کوئی بھی فریق عمل سے بالاتر نہیں ہو سکتا۔ اس لیے جو قواعد ہندو مذہبی ٹرسٹوں پر لاگو ہوتے ہیں اب وقف پر بھی یکساں طور پر لاگو ہوں گے۔ اب تک موجودہ وقف کو کورٹ فیس میں چھوٹ ملتی تھی۔ تاہم اب اسے ختم کر دیا گیا ہے۔خبروں کے مطابق گجرات کے مختلف حصوں میں واقع کئی وقف اداروں نے گجرات اسٹیٹ وقف ٹریبونل کے احکامات کو ہائی کورٹ میں چیلنج کیا تھا۔ ان احکامات میں کہا گیا ہے کہ وقف سے متعلق تنازعات کی سماعت سے قبل متعلقہ عرضی گزاروں کو مقررہ عدالتی فیس جمع کرنی ہوگی۔ وقف ٹرسٹوں کا کہنا تھا کہ وہ مذہبی اور خیراتی ادارے ہیں اس لیے انہیں کورٹ فیس سے استثنیٰ دیا جانا چاہیے۔ان عرضی گزاروں میں سنی مسلم عیدگاہ مسجد ٹرسٹ، وڈودرا شہر مسجد سبھا ٹرسٹ اور احمد آباد کی سرخیز روزہ کمیٹی جیسے ممتاز وقف ٹرسٹ شامل تھے۔ ان ٹرسٹوں کے تنازعات ریاست بھر میں پھیلی ہوئی اہم جائیدادوں سے متعلق تھے جن میں کرائے کی وصولی، قبضے کو لیکرتنازعات اور جائیداد کے حقوق جیسے مسائل شامل تھے۔معاملے کی سماعت کرتے ہوئے جسٹس جے سی دوشی نے تمام درخواستیں خارج کر دیں۔ عدالت نے کہا کہ عرضی گزاروں نے وقف ٹریبونل کے سامنے جو راحتیں مانگی تھیں وہ ایک دوسرے سے متصادم ہیں۔ ایسے معاملات میں صرف رسمی حکم کے بجائے فریقین کے حقوق اور ذمہ داریوں کا عدالتی تعین ضروری ہے۔ ہائی کورٹ نے واضح طور پر کہا کہ جہاں جائیداد کے حقوق، قبضہ یا کرایہ جیسے معاملات طے کرنے ہوں وہاں عدالتی فیس معاف نہیں کی جا سکتی۔ ایسے تنازعات میں عدالت کو حقائق اور قانون کی بنیاد پر فیصلہ کرنا ہوتا ہے اور اس کے لیے قائم شدہ طریقہ کار کی پیروی ضروری ہے۔عدالت نے کہا کہ وقف ٹریبونل میں دائر درخواستوں پر گجرات کورٹ فیس ایکٹ 2004 لاگو ہوگا۔ ان مقدمات کی سماعت سیول عدالتوں کی طرح ہی ہوگی۔ اب مسلم وقف دیگر مذہبی ٹرسٹوں یا خیراتی اداروں کے برابر مانا جائے گا۔ عدالت نے واضح کیا ہے کہ اب سے مسلم وقف بورڈ اور اس سے منسلک اداروں کو دیگر مذہبی ٹرسٹوں کی طرح ہی کورٹ فیس ادا کرنی ہوگی۔اس فیصلے کے بعد اب گجرات میں وقف اداروں کو وقف املاک سے متعلق معاملات میں دیگر فریقوں کی طرح کورٹ فیس ادا کرنا ہوگی۔ خیال کیا جاتا ہے کہ اس سے وقف ٹربیونل اورعدالتوں میں زیر التوا مقدمات کاعمل مزید واضح اور سخت ہوجائے گا۔ گجرات ہائی کورٹ کے فیصلے پر نائب وزیر اعلیٰ ہرش سنگھوی نے خوشی کا اظہار کیا ہے۔ اب مقدمات کم آئیں گے تو زیرالتوائٰ مقدمات کو جلد از جلد حل کیا جاسکے گا۔
انہوں نے کانگریس پارٹی پر مہاتما گاندھی کے نظریات کو دھوکہ دینے کا بھی الزام لگایا، کہا کہ پارٹی نے ہندوستان کی تقسیم کو قبول کیا اور آزادی کے بعد کانگریس پارٹی کو تحلیل کرنے کے گاندھی کے مطالبے کو نظر انداز کیا۔ کانگریس نے خود گاندھیائی اصولوں کو تباہ کر دیا تھا۔