پولیس کی موجودگی میں گاو رکھشکوں کی شرانگیزی: ویڈیو وائرل
نئی دہلی: مہاراشٹر لاتور میں گاو رکھشکوں نے ایک مسلمان ڈرائیور کو سر پر ٹوپی پہن کر گائے کے سامنے جھکنے پر مجبور کیا ۔ یہ ویڈیو سوشل میڈیا پر وائرل ہوگیا۔ ویڈیو میں دیکھا جاسکتا ہے کہ ہجوم نے متاثرہ شخص کو مارپیٹ بھی کی ۔ جس وقت یہ واقعہ پیش آیا اس وقت وہاں پولیس موجود تھی ۔ سر پر ٹوپی پہننے اور گائے کے سامنے جھکنے پر مجبور کرنے کے ویڈیو سوشل میڈیا پر منظر عام پر آنے کے بعد لوگوں میں غم و غصے کی لہر دوڑ گئی۔ رپورٹ کے مطابق لاتور کے ایس پی سومے منڈے نے دو کانسٹیبلز اور تین ہوم گارڈز کے خلاف کارروائی کی ہے جو مبینہ طور پر حملہ کے وقت موجود تھے۔ پولیس میں شکایت میں ڈرائیور پر حملہ کرنے والے گاو رکھشکوں کے خلاف کارروائی کا مطالبہ کیا گیا ۔ بتایا گیا ہے کہ ڈرائیور 23 اپریل کو پٹودہ کی جانوروں کی منڈی سے جملہ 15 مویشی ایک منی ٹرک میں اوسہ منڈی لے جارہا تھا۔اس کے پاس مویشیوں کی تجارت کیلئے تمام قانونی کاغذات تھے لیکن منڈی پہنچنے سے پہلے روک لیا گیا۔ پولیس موقع پر پہنچ گئی۔ دستاویزات کے باوجود ڈرائیور کے خلاف جانوروں پر ظلم کرنے پر ایف آئی آر درج کرائی گئی۔