نئی دہلی ۔2؍اگست ( ایجنسیز)دنیا کے امیر ترین کاروباری ایلون مسک کی کمپنی اسٹار لنک کو ہندوستان میں سیٹلائٹ بیسڈ انٹرنیٹ سروس شروع کرنے کیلئے یونیفائڈ لائسنس مل گیا ہے اور ساتھ ہی اسپکٹرم الاٹمنٹ کیلئے پالیسی فریم ورک کو بھی حتمی شکل دے دی گئی ہے۔ مرکزی وزیر ٹیلی مواصلات جیوترادتیہ سندھیا نے یہ اطلاع دی۔ملک میں پہلے موبائل کال کے 30 سال مکمل ہونے پر یہ اعلان کیا گیا۔ سندھیا نے کہاکہ اسٹار لنک کو ہندوستان میں سیٹلائٹ انٹرنیٹ خدمات شروع کرنے کیلئے یونیفائڈ لائسنس دیا گیا ہے۔ ہندوستانی گروپ حمایت یافتہ یوٹیل سیٹ ون ویب اور جیو ایس ای ایس کو بھی سیٹلائٹ پر مبنی مواصلات خدمات شروع کرنے کے لیے اسپکٹرم الاٹمنٹ کا انتظار ہے۔ سندھیا نے کہا کہ دور دراز کے گاؤں سے لے کر میٹرو شہروں تک ڈیجیٹل پہنچ نے شہریوں کو بااختیار بنایا ہے اور ہندوستان کو سستی اور جامع ٹکنالوجی کا عالمی قائد بنا دیا ہے۔ انہوں نے بتایا کہانٹرنیٹ صارفین 286 فیصد بڑھ کر 97 کروڑ تک پہنچ چکے ہیں۔ براڈ بینڈ استعمال بھی 2014 کے مقابلے میں 1450 فیصد بڑ کر اب 94.4 کروڑ ہو گیا ہے۔وزیر ٹیلی مواصلات نے آگے کہا کہ موبائل ڈاٹا کی شرح میں 96.6 فیصد کی گراوٹ کے ساتھ ہندوستان عالمی سطح پر سب سے سستا ڈاٹا فراہم کرنے والا ملک بن گیا ہے۔ انہوں نے کہا کہ سرکاری ٹیلی مواصلات کمپنی بی ایس این ایل کا دوبارہ قدم جمانا بڑی کامیابی ہے۔ سندھیا نے کہاکہ 18 برسوں میں پہلی بار بی ایس این ایل نے مسلسل دو برسوں تک خالص منافع درج کیا ہے۔ اس نے 83000 سے زیادہ 4جی نیٹ ورک سائٹ قائم کیے ہیں جن میں سے 74000 پہلے ہی چالو ہو چکے ہیں۔سندھیا نے کہا کہ ملک کے 99.6 فیصد ضلعوں تک 5 جی نیٹ ورک کوریج ہو چکا ہے اور 4.74 لاکھ 5 جی ٹاوروں کے توسط سے 30 کروڑ صارفین اس کا فائدہ اٹھا رہے ہیں۔ فی شخص ماہانہ 5 جی ڈاٹا کھپت 32 جی بی ہے جو دنیا میں سب سے زیادہ ہے۔ ٹیلی کام انڈسٹری آرگنائزیشن سیلیولر آپریٹرس ایسو سی ایشن آف انڈیا (سی او اے آئی) کے ڈائرکٹر جنرل ایس پی کوچر نے تقریب کے دوران کہا کہ ہندوستان دنیا کا دوسرا سب سے بڑا ٹیلی کمیونکیشنز کا بازار ہے۔ آج ایک اوسط ہندوستانی صارف فی مہینہ 21 جی بی سے زیادہ ڈاٹا کا استعمال کرتا ہے۔
