نئی دہلی ۔31مارچ ۔(سیاست ڈاٹ کام) مارکسی کمیونسٹ پارٹی (سی پی ایم) کے جنرل سکریٹری سیتا رام یچوری نے کورونا وائرس (کووڈ۔19) سے لڑنے کے لئے حکومت کے سامنے سات سوال اٹھاتے ہوئے کورونا وائرس کے مشتبہ مریضوں کی زیادہ سے زیادہ جانچ کرانے پر زور دیا ہے تاکہ ہم بروقت اس کا حل نکال سکیں۔یچوری کا یہ بھی کہنا ہے کہ جب پہلے ہی وزیر اعظم ریلیف فنڈ کام کر رہا ہے تو الگ سے پی ایم کیئر فنڈ بنانے کی ضرورت کیا تھی۔ انہوں نے ٹوئٹ کرکے ان سوالات کو اٹھاتے ہوئے یہ بھی پوچھا ہے کہ کورونا وائرس کے بارے میں وزیر داخلہ امیت شاہ اور وزیر صحت ڈاکٹر ہرش وردھن روز شام کو خود پریس کانفرنس کیوں نہیں کر رہے ہیں۔ انہوں نے کہا کہ ایسے وقت میں ایمانداری اور شفاف طریقے سے سوالات کے جواب دینے کی ضرورت ہے لیکن یہ دونوں وزرا ء میڈیا کے سامنے بریفنگ میں سامنے نہیں آتے ۔انہوں نے کہا کہ عالمی ادارہ صحت (ڈبلیو ایچ او) نے بار بار خبردار کیا ہے کہ ڈاکٹروں، نرسوں وغیرہ کے لئے ماسک، گیئر زاور دیگر ضروری ایکوپمینٹ فراہم کی جائے ۔ حکومت آخر اسے خریدنے میں تاخیر کیوں کر رہی ہے ۔
