عوامی شراکت اہم ، خانگی کردار کی بھی ضرورت ۔ وزیراعظم کا ’شِکشک پرو‘ سے خطاب
نئی دہلی: وزیراعظم نریندر مودی نے آج ویڈیو کانفرنسنگ کے ذریعہ شکشک پروکے افتتاحی اجلاس سے خطاب کیا۔ انہوں نے اشاروں کی ہندوستانی زبان کی لغت، ٹاکنگ بکس ،سی بی ایس ای کا اسکول کے معیار کی یقین دہانی اور تجزیے کا فریم ورک، نپن ہندوستان اور ودیانجلی پورٹل کے لیے ٹیچروں کا تربیتی پروگرام نشٹھا(تعلیمی رضاکاروں / عطیہ دینے والوں / اسکول کی ترقی کے لیے سی ایس آر تعاون کرنے والوں کی سہولت کے لیے )کا بھی آغاز کیا۔اجتماع سے خطاب کرتے ہوئے وزیراعظم نے قومی ایوارڈ جیتنے والے اساتذہ کو مبارکباد دی۔ انہوں نے ان ٹیچروں کے تعاون کی ستائش کی جنہوں نے ملک میں مشکل وقت میں طلباء کے مستقبل کو تعمیر کرنے میں تعاون کیا۔ انہوں نے کہا کہ آج ، شکشک پرو کے موقع پر ، کئی نئی اسکیموں کا آغاز کیا گیا ہے جو اس لیے بھی بہت اہم ہے کیوں کہ ملک سردست آزادی کا امرت مہوتسو منا رہا ہے۔وزیراعظم نے کہاکہ کسی بھی قوم کی ترقی میں عوامی شراکت کا اہم رول ہوتا ہے لیکن ساتھ ہی خانگی شراکت کو بھی نظرانداز نہیں کیا جاسکتا جو ہمہ جہت ترقی کیلئے ضروری ہے۔ ہندوستان آزادی کے 100 سال بعد کیسا ہوگا اس کا عہد کرتے ہوئے وزیراعظم نے وبا کے چیلنج پر کھرا اترنے کے لیے طلباء ، اساتذہ اور پوری تعلیمی برادری کی ستائش کی اور ان سے کہا کہ وہ اس طرح کے مشکل وقت سے نمٹنے کے لیے اپنی صلاحیتوں میں مزید اضافہ کریں۔ انہوں نے کہا کہ اگرچہ ہم تبدیلی کے دور کے درمیان ہیں، لیکن خوش قسمتی سے ہمارے پاس جدید اور مستقبل پر مبنی نئی تعلیمی پالیسی بھی موجود ہے ۔وزیراعظم نے قومی تعلیمی پالیسی تیار کرنے اور اسے نافذ کرنے میں ماہرین تعلیم ، دیگر ماہرین ، اساتذہ کی ہر سطح پر تعاون کے لیے ستائش کی ۔
مودی کا 14 ستمبر کو علیگڑھ کے دورہ کا امکان
لکھنؤ: وزیر اعظم نریندر مودی 14ستمبر کو علی گڑھ کا دورہ کرسکتے ہیں۔موصول اطلاع کے مطابق لمبے وقفے کے بعد یوپی آرہے وزیر اعظم علی گڑھ میں 14ستمبر کو راجا مہندر سنگھ ریاستی یونیورسٹی کے ساتھ دیگر دو پراجکٹس کا سنگ بنیاد رکھیں گے ۔ سرکاری ذرائع نے بتایا کہ پی ایم او آفس سے دورہ کی منظوری حاصل کرنے کے بعد وزیر اعلی آفس نے پروگرام کو حتمی شکل دے دی ہے ۔راجا مہندر سنگھ یونیورسٹی کے علاوہ وزیر اعظم علی گڑھ ڈیفنس کاریڈور کا سنگ بنیاد رکھیں گے ۔یہ تقریب یونیورسٹی کے لئے لودھا بلاک میں حاصل کی گئی زمیں پر منعقد ہوگی۔