کراچی۔4 ستمبر (سیاست ڈاٹ کام ) پاکستان کرکٹ بورڈ (پی سی بی) نے تاریخی فیصلہ کرتے ہوئے اپنے عہد کپتانی میں پاکستانی ٹیم کو عالمی نمبر ایک ٹسٹ ٹیم بنانے والے مصباح الحق کو پہلی مرتبہ بیک وقت چیف سلیکٹر اورہیڈ کوچ مقررکردیا جبکہ سابق کوچ وقار یونس کو بولنگ کوچ کی ذمہ داریاں سونپ دی گئیں۔پی سی بی کی جانب سے جاری اعلامیے میں کہا گیا کہ کرکٹ کے امور میں شفافیت اور احتساب کا نظام لانے کے لیے مصباح الحق کو چیف سلیکٹر کا عہدہ بھی سونپ دیا گیا ہے۔علاوہ ازیں پی سی بی نے سابق ہیڈ کوچ وقار یونس کو اس مرتبہ آئندہ 3 برس کے لیے ٹیم کا بولنگ کوچ مقررکردیا۔حال ہی میں کرکٹ کمیٹی سے استعفیٰ دینے والے مصباح الحق آئندہ 3 سال تک اپنی ذمہ داری نبھائیں گے۔پی سی بی کے بموجب نئے کرکٹ اسٹرکچر کے مطابق 6 کرکٹ اسوسی ایشنز کے ہیڈ کوچز بھی مصباح الحق کی سربراہی میں کام کرنے والی سلیکشن کمیٹی کا حصہ ہوں گے۔ مصباح الحق کی تجویز پر ہی وقار یونس کو ٹیم کا بولنگ کوچ مقرر کیا گیا۔ خیال رہے کہ پاکستان کرکٹ کی تاریخ میں پہلی مرتبہ ہیڈ کوچ کو ہی سلیکشن کمیٹی کا چیئرمین مقرر کیا گیا۔پی سی بی کے اعلان کے بعد گفتگو کرتے ہوئے مصباح الحق نے کہا ہے کہ پاکستان کرکٹ ٹیم کی کوچنگ کرنا اور بہترین ناموں میں شامل ہونا میرے لیے اعزاز کی بات ہے۔ مصباح نے یہ بھی کہا کہ پاکستانی عوام کی دھڑکنیں کرکٹ کے ساتھ دھڑکتی ہیں لیکن ٹیم کی کوچنگ کرنا ایک بہت بڑی ذمہ داری ہے۔نو منتخب کوچ نے کہا کہ اگر میں یہ ذمہ داری نبھانے کے لیے تیار نہیں ہوتا تو کبھی بھی اس کے لیے درخواست نہیں دیتا۔ وقار یونس کو بولنگ کوچ کے طور پر تقررکیے جانے سے متعلق بات کرتے ہوئے مصباح الحق نے کہا کہ وہ وقار یونس کے تجربے سے بھرپور فائدہ اٹھانے کی کوشش کریں گے جبکہ بولنگ کوچ کے لیے ان سے اچھا کوئی انتخاب نہیں ہوسکتا تھا۔اس موقع پر پی سی بی کے چیف ایگزیکٹو وسیم خان نے کہا ہے کہ قائدانہ صلاحیتوں کے حامل سابق کپتان مصباح الحق کو ٹیم کے ہیڈ کوچ کی ذمہ داری دینا ان کے لیے باعث خوشی ہے۔ انہوں نے ہیڈ کوچ کے لیے درخواست دینے والے تمام قومی اور بین الاقوامی امیدواروں کا شکریہ بھی ادا کیا اور کہا کہ کوچز پینل نے بہترین تجربہ اور مکمل علم رکھنے والے مصباح الحق کے انتخاب کا متفقہ فیصلہ کیا۔
