قاہرہ : 2 جولائی ( ایجنسیز ) مصر کی وزارتِ پٹرولیم اور معدنی وسائل نے کہا ہے کہ اسے تیل نکالنے والی کمپنی ’اوسوو‘ سے اطلاع ملی ہے کہ ’ادمارن 12‘ نامی بحری بارج جبل الزیت کے علاقہ میں ڈوب گیا ہے۔وزارت نے کہا ہے کہ ’مصر کے وزیرپٹرولیم و معدنی وسائل کریم فواد اور وزیرمحنت محمد جبران اعلیٰ سطح کی ٹیم کیساتھ حادثہ کے مقام پر پہنچے اور صورتحال کا جائزہ لے کر ریسکیو آپریشن اور فوری اقدامات کی نگرانی کی ہے‘۔وزارت نے مزید وضاحت کی ہے کہ ’بحیرہ احمر کے شمال میں واقع جبل الزیت کے علاقہ میں منگل کی شام سمندری حادثہ پیش آیا جب ’اد مارن 12‘ نامی تیل نکالنے والا رِگ تین بحری یونٹس کی مدد سے ایک نئی جگہ منتقل کیا جا رہا تھا‘۔’اس دوران وہ ڈوب گیا جبکہ حادثے کے وقت اس وقت 31 افراد سوار تھے جن میں تکنیکی اور آپریشنل عملہ شامل تھا‘۔مصر کے پیٹرولیم ذرائع نے بتایا ہے کہ’ اب تک غرق شدہ رِگ کے عملے میں سے 4 افراد کی لاشیں نکالی جا چکی ہیں‘۔’ریسکیو یونٹس باقی 6 لاپتہ افراد کی تلاش میں مصروف ہیں جبکہ 21 افراد کو بچا لیا گیا ہے‘۔
