جناب سید وقار الدین کے انتقال پر کاماریڈی کے علماء کا اظہار تعزیت
کاماریڈی۔ جناب سید وقار الدین قادری چیف ایڈیٹر روزنامہ ’’رہنمائے دکن‘‘ حیدرآباد کا شمار سچے باوقار بے لوث صحافیوں میں ہوتا تھا، پورے ملک کے علاوہ اہل ذوق آپ کے قلم اور اخبار کو پسند کرنے والے بیرون ملک میں مقیم بھی بڑے شوق سے پڑھا کرتے ہیں، آپ صحافت کے علاوہ انڈو عرب لیگ کے صدر نشین تھے، اس انڈو عرب لیگ پلیٹ فارم سے مظلوم فلسطینیوں کے حق میں آپ نے علم انصاف کو بلند کیا، اور قبلہ اول، بیت المقدس کی بازیابی کے لئے عالم اسلام میں بالخصوص ہندوستان میں اپنی منفرد تحریک کے ذریعے امت کی ذہن سازی کی، ان خیالات کا اظہار حافظ فہیم الدین منیری صدر جمعیۃ علماء کاماریڈی نے مرحوم کے حق میں تعزیتی کلمات پیش کرتے ہوئے کیا، جبکہ مفتی خواجہ شریف مظاہری ترجمان مجلس تحفظ ختم نبوت ٹرسٹ کاماریڈی نے کہا کہ سید وقار الدین قادری مرحوم اپنے زور قلم سے اْردو صحافت کے معیار کو بلند کیا، اور خوب اردو کی ترجمانی کی، اب شعبہ صحافت کا وہ درخشندہ ستارہ اب غروب ہوا، دکن کے نامور عظیم صحافی اور رہنما سے ہم محروم ہوگئے۔ آپ کی صحافت یقینا مسلمانوں کو بیدار کرنے میں اہم رول اور آئندہ کے لئے نمونہ تھی۔ اللہ تعالیٰ سے دعاء ہے کہ اللہ آپ کی مغفر ت فرمائے اور جنت الفردوس میں اعلیٰ مقام عطاء فرمائے اور اردو صحافت کے میدان میں ہمیں نعم البدل عطاء فرمائے۔