دارجلنگ میں پل منہدم‘ چیف منسٹر ممتابنرجی کا متاثرہ علاقوں کا آج دورہ ‘وزیر اعظم کا ہلاکتوں پر افسوس
کولکاتہ ۔5؍اکتوبر( ایجنسیز ) مغربی بنگال کے میرک اور دارجلنگ کی پہاڑیوں میں شدید بارشوں کے نتیجے میں کئی بچوں سمیت کم از کم23 افراد ہلاک اور کئی دیگر شدید زخمی ہو گئے۔ اتوار کے روزشمالی بنگال پولیس کے ڈی جی اور آئی جی راجیش کمار یادو نے شام کو بتا یا کہ اب تک مرنے والوں کی تعداد 23 ہوگئی ہے۔ اس کے بڑھنے کا امکان ہے۔ چیف منسٹر مغربی بنگال ممتا بنرجی نے اعلان کیا ہے کہ وہ کل پیر کو شمالی بنگال کا دورہ کریں گی تاکہ مسلسل موسلا دھار بارش، سیلاب اور لینڈ سلائیڈنگ سے پیدا ہونے والی صورت حال کا جائزہ لے سکیں جس نے دارجلنگ، کلمپونگ اور ملحقہ اضلاع میں تباہی مچا دی ہے ۔وزیر اعظم نریندر مودی نے بنگال میں جان و مال کے نقصان پر گہرے رنج کا اظہار کرتے ہوئے کہا کہ صورت حال پر گہری نظر رکھی جا رہی ہے اور حکومت متاثرین کو ہر ممکن مدد فراہم کرنے کیلئے پرعزم ہے ۔ جہاں شدید بارش اور متعدد لینڈ سلائیڈنگ کی وجہ سے مقامی لوگ اور سیاح متاثر ہوئے ہیں۔مغربی بنگال کے دارجلنگ میں موسلا دھار بارش اور مٹی کے تودے گرنے کے مختلف واقعات میں سے کم از کم 23لوگوں کی موت ہو گئی جبکہ ایک لوہے کا پل منہدم ہو گیا۔ طوفانی بارش اور لینڈ سلائیڈنگ کی وجہ سے کئی دیہاتوں سے رابطہ منقطع ہو گیا ہے۔ راحت اور بچاؤ ٹیمیں جائے وقوعہ پر پہنچ گئی ہیں اور ملبہ ہٹانے میں مصروف ہیں۔اطلاعات کے مطابق لوہے کا یہ پل جسے دھودیا آئرن برج کے نام سے جانا جاتا ہے، میرک اور کرسیونگ علاقوں کو آپس میں ملاتا ہے۔ شدید بارش کی وجہ سے یہاں کے حالات انتہائی خراب ہو گئے ہیں۔ سڑکوں پر ہر طرف ملبہ اور کیچڑ نظر آ رہا ہے۔ اس دوران محکمہ موسمیات نے دارجلنگ، کوچ بہار، کلمپونگ، جلپائی گوڑی اور علی پور دوار میں شدید بارش کے لیے ریڈ الرٹ جاری کیا ہے۔محکمہ موسمیات کا کہنا ہے کہ مغربی بنگال کے ذیلی ہمالیائی علاقوں میں پیر تک موسلا دھار بارش جاری رہے گی۔ بھاری بارش کی وجہ سے جلپائی گوڑی کا مال بازار پانی میں ڈوب گیا ہے۔ تیستا، مال اور دیگر پہاڑی ندیاں طغیانی پر ہیں۔ محکمہ موسمیات کا کہنا ہے کہ مغربی جھارکھنڈ کے اوپر کم دباؤ کا علاقہ مشرق۔مغربی یعنی بہار کی طرف بڑھ سکتا ہے۔کلمپونگ ضلع میں بھی شدید بارش کی وجہ سے صورتحال تشویشناک ہے۔ پہاڑی علاقوں میں لینڈ سلائیڈنگ کا خطرہ بڑھ گیا ہے۔ سلی گوڑی اور سکم کو جوڑنے والا متبادل راستہ قومی شاہراہ 717 ای پر لینڈ سلائڈنگ کی وجہ سے ملبہ جمع ہوگیا جس سے ٹریفک پوری طرح بند ہوگیا ہے۔ پیڈونگ اور رشیی کھولا کے درمیان بھی ٹریفک میں خلل پڑا ہے۔