کولکتہ : بی جے پی صدر جے پی نڈا مغربی بنگال کے دو روزہ دورہ پر ہیں۔ ڈائمنڈ ہاربر میں ان کے قافلے پر کچھ مظاہرین نے آج پتھراؤ کیا اور سڑک کو بند کرنے کی کوشش بھی کی۔ریاست کے ڈائمنڈ ہاربر میں جے پی نڈّا کے قافلے پر کچھ مظاہرین نے پتھراؤ کیا۔ اس کے ساتھ ہی قافلے کو روکنے کی بھی کوشش کی گئی ہے۔ نڈّا کے قافلے پر حملہ کی ویڈیو وائرل ہو رہی ہے اور جس گاڑی پر حملہ ہوا ہے اس میں کیلاش وجے ورگیہ موجود تھے۔بی جے پی نے اس حملہ کے تعلق سے ترنمول کانگریس کو مورد الزام ٹھہرایا اور کہا ہے کہ یہ برسراقتدار پارٹی ترنمول کانگریس کی سازش ہے۔ مغربی بنگال بی جے پی سربراہ دلیپ گھوش نے کہا کہ پارٹی صدر جے پی نڈا کے ریاستی دورہ کے دوران سیکورٹی میں کوتاہی ہوئی ہے۔ کل ان کے پروگرام میں پولیس کی کوئی موجودگی نہیں تھی اور اس سلسلے میں مرکزی وزیر داخلہ امیت شاہ کے ساتھ ساتھ مقامی انتظامیہ کو بھی خط لکھا گیا ہے۔اس درمیان بی جے پی کے الزامات کو ترنمول کانگریس نے سرے سے مسترد کر دیا ہے۔ ترنمول لیڈروں کا کہنا ہے کہ نڈّا کے قافلے پر حملہ ترنمول کے لوگوں نے نہیں کرایا ہے۔ چیف منسٹر مغربی بنگال ممتا بنرجی نے کل ہی بی جے پی پر اس طرح کا الزام عائد کیا تھا کہ پارٹی منصوبہ بند سازش کے تحت خود اپنے کارکنوں پر گولی چلوا رہی ہے۔قافلے کی گاڑیوں پر اینٹ اور پتھر پھینکے گئے جس سے کئی گاڑیوں کو نقصان پہنچا ۔ اس سے کئی کارکنوں کے بھی زخمی ہونے کی اطلاع ہے۔