کولکاتہ18 جون (سیاست ڈاٹ کام)لوک سبھا انتخابات میں شکست کا سامنا کرنے کے بعدوزیراعلیٰ ممتا بنرجی ہر ہفتے ایک ضلع کے پارٹی لیڈروں کے ساتھ میٹنگ کرتی ہیں،ہگلی اور ندیا ضلع کے بعد وزیرا علیٰ ممتا بنرجی نے مغربی مدنی پور ضلع ترنمول کانگریس کے لیڈران کے ساتھ آج میٹنگ کی جس میں ضلع سینئر لیڈران سمیت بلدیاتی اور پنچایتی اداروں کے نمائندے شرکت کررہے ہیں۔ وزیر اعلیٰ ممتا بنرجی ہر جمعہ ضلع لیڈران کے ساتھ میٹنگ کرتی ہیں،اسمبلی انتخابات سے قبل وزیرا علیٰ ممتا بنرجی پارٹی کی از سر نو تنظیم کرنے میں لگی ہوئی ہیں،مغربی مدنی پور ضلع کے ترنمول کانگریس لیڈران کے ساتھ میٹنگ میں لوک سبھا انتخابات میں شکست کے وجوہات پر لیڈران کے ساتھ بات چیت کررہی ہیں۔وزرے اعلیٰ بلاک لیڈران، میونسپلٹی کے چیرمین،وائس چیرمین، گرام پنچایت اور پنچایت سمیتی کے ممبران کو اپنی بات رکھنے کا بھرپور موقع دے رہی ہے ۔اس کے علاوہ اس ضلع سے ترنمول کانگریس کے ممبران اسمبلی، مغربی مدنی پور سے شکست کا سامنا کرنے والے مانس بھوئیاں، کھٹال سے جیت درج کرنے والے دیب اور دیگرلیڈران بھی میٹنگ میں موجود ہیں۔ خیال رہے کہ مغربی مدنی پور لوک سبھا سے ترنمول کانگریس کے امیدوار مانس بھوئیاں کو بی جے پی امیدوار دلیپ گھوش نے 87,000ہزار ووٹوں سے شکست دیا تھا۔صرف کھڑکپور دیہی اسمبلی حلقے سے ترنمول کانگریس کو سبقت ملی تھی۔باقی تمام اسمبلی حلقوں سے ترنمول کانگریس کو بچھڑگئی تھیں۔مانس بھوئیاں پارٹی کے ہیوی ویٹ لیڈر ہیں اور ان کی شکست سے پارٹی کو زبردست جھٹکا لگا ہے۔ ترنمول کانگریس کے ذرائع کے مطابق اپوزیشن کے ووٹ متحد ہونے کے علاوہ پارٹی میں اندرونی اختلافات کی وجہ سے بھی پارٹی کو شکست کا سامنا کرنا پڑا ہے۔قیاس یہ لگایا جارہا ہے کہ میٹنگ کے بعد پارٹی میں تنظیمی سطح پر تبدیلی کی جاسکتی ہے ۔ریاستی وزیر شوبھندو ادھیکاری کو مغربی مدنی پور کی ذمہ داری سونپ دی گئی ہے ۔
