منڈل ہیڈ کوارٹر س پر سب اسٹیشن کے روبرو کے سی آر کا پتلہ نذر آتش کرنے کارکنوں سے اپیل
حیدرآباد۔/11 جولائی، ( سیاست نیوز) کانگریس سے خوفزدہ بی آر ایس نے کسانوں کو 24 گھنٹے مفت برقی کی سربراہی کے مسئلہ پر صدر پردیش کانگریس ریونت ریڈی کے بیان کو توڑ مروڑ کر پیش کرتے ہوئے سیاسی فائدہ اٹھانے کی کوشش کی ہے۔ تلگو اسوسی ایشن آف نارتھ امریکہ کے اجلاس میں امریکہ کے شہر فلاڈلفیہ میں شرکت کرتے ہوئے ریونت ریڈی نے کسانوں کو مفت برقی کی سربراہی پر تبصرہ کرتے ہوئے کہا تھا کہ زیادہ تر کسان 3 ایکر سے کم اراضی رکھتے ہیں اور اگر ہر ایکر کیلئے بلا وقفہ ایک گھنٹہ برقی سربراہ کی جائے تو فصلوں کو بچایا جاسکتا ہے۔ انہوں نے افسوس کا اظہار کیا کہ بی آر ایس حکومت اگرچہ 24 گھنٹے برقی سربراہی کا دعویٰ کررہی ہے لیکن 8 گھنٹے بھی سربراہی عمل میں نہیں آرہی ہے۔ ریونت ریڈی کے اس بیان کے وائرل ہوتے ہی بی آر ایس نے وزراء سے لے کر اضلاع کے سطح تک ریونت ریڈی کے خلاف مہم کا آغاز کردیا اور کانگریس پارٹی کے علامتی پتلے نذر آتش کئے گئے۔ کے ٹی راما راؤ، ہریش راؤ، جگدیش ریڈی اور دیگر وزراء کے علاوہ ارکان مقننہ نے ریونت ریڈی کو مفت برقی سربراہی کا مخالف قرار دیتے ہوئے کہا کہ اگر کانگریس برسراقتدارآئے تو مفت برقی سربراہی ختم کردی جائے گی۔ صدر پردیش کانگریس ریونت ریڈی نے ٹوئٹر پر اپنے بیان کی وضاحت کی اور الزام عائد کیا کہ بی آر ایس نے یہ ثابت کردیا ہے کہ وہ بی جے پی کی بی ٹیم ہے۔ راہول گاندھی کے خلاف مرکزی حکومت کی کارروائی پر بطور احتجاج کانگریس نے کل چہارشنبہ کو ایک روزہ ستیہ گرہ کی اپیل کی ہے۔ اس مسئلہ سے عوامی توجہ ہٹانے کیلئے بی آر ایس نے مفت برقی سربراہی کرنے کے مسئلہ پر میرے بیان کو توڑ مروڑ کر پیش کیا ہے۔ انہوں نے کہا کہ بی آر ایس نے 24 گھنٹے مفت سربراہی کے نام پر کسانوں کو دھوکہ دیا ہے۔ کسانوں کو 12 گھنٹے بھی سربراہی نہیں ہے جس کا کسی بھی سب اسٹیشن جاکر پتہ چلایا جاسکتا ہے۔ ریونت ریڈی نے کہا کہ 9 برسوں میں برقی اداروں پر 60 ہزار کروڑ کے قرض کا بوجھ عائد کیا گیا اور یہ کے سی آر کی بے قاعدگیوں کا ثبوت ہے۔ ریونت ریڈی نے کہا کہ کسانوں کو 24 گھنٹے مفت برقی سربراہی کے نام پر دھوکہ دہی کے خلاف ریاست کے تمام منڈل ہیڈکوارٹرس پر سب اسٹیشنوں کے روبرو کے سی آر کا علامتی پتلہ نذر آتش کرنے کی کارکنوں سے اپیل کی گئی ہے۔ ریونت ریڈی نے ریاست بھر میں کانگریس کارکنوں کو احتجاج میں حصہ لینے کی اپیل کی تاکہ بی آر ایس کے گمراہ کن پروپگنڈہ کا جواب دیا جاسکے۔ واضح رہے کہ ریونت ریڈی کے بیان پر بی آر ایس کی جانب سے شدید ردعمل کا اظہار کرتے ہوئے انہیں تنقیدوں کا نشانہ بھی بنایا جارہا ہے ۔ر
