اترپردیش کی سیاست میں ہلچل‘ لکھنؤ کینٹ حلقہ سے مقابلہ کا امکان
نئی دہلی: اتر پردیش کے سابق چیف منسٹر اور سماج وادی پارٹی کے سینئر ترین قائد ملائم سنگھ یادو کی چھوٹی بہو اپرنا یادو نے بھارتیہ جنتا پارٹی (بی جے پی) میں آج شمولیت اختیار کر لی۔ چہارشنبہ کو اپرنا یادو نے اتر پردیش بی جے پی یونٹ کے صدر سوتنتر دیو سنگھ اور ریاست کے نائب وزیر اعلی کیشوپرساد موریہ کی موجودگی میں بی جے پی میں شمولیت اختیار کی۔ اس کے بعد انہوں نے پارٹی صدر جگت پرکاش نڈا اور اتر پردیش کے چیف منسٹر یوگی آدتیہ ناتھ سے بھی ملاقات کی۔بی جے پی میں شامل ہونے کے بعد اپرنا یادو نے کہا کہ وہ ہمیشہ وزیر اعظم نریندر مودی سے متاثررہی ہیں۔ ان کی سوچ میں ملک سب سے پہلے ہے۔ وہ اب قوم کی خدمت کے لیے نکلی ہیں۔ انہوں نے بتا یا کہ وہ بی جے پی کی دیگر تمام اسکیموں سے متاثر ہوئی ہیں جن میں سوچھ بھارت مشن، خواتین کے لیے سوالمبن جیون شامل ہیں۔ انہوں نے بی جے پی کا شکریہ ادا کیا کہ انہوں نے ان کو پارٹی کا حصہ بننے کا موقع دیا۔اس موقع پر اتر پردیش بی جے پی صدر نے اپرنا یادو کا پارٹی میں خیرمقدم کرتے ہوئے کہا کہ ایس پی کے دور حکومت میں غنڈہ گردی کو اتنی اہمیت دی گئی کہ ریاست میں کوئی بیٹی محفوظ نہیں رہی۔ اپرنا یادو نے شروع سے ہی محسوس کیا کہ آدتیہ ناتھ کی قیادت والی بی جے پی حکومت میں اچھی حکمرانی ہوئی ہے۔ موریہ نے کہا کہ اپرنا یادو کا نظریہ ہمیشہ بی جے پی سے متاثر رہا ہے جیسا کہ ان کے بیانات سے ظاہر ہوتا ہے۔ مودی اور آدتیہ ناتھ کی قیادت میں جو ترقی ہو رہی ہے اسے دیکھ کر بہت سے لوگ بی جے پی میں شامل ہو رہے ہیں۔انہوں نے کہا کہ اتر پردیش کے سابق وزیر اعلی اور ایس پی صدر اکھلیش یادو اپنے خاندان اور پارٹی دونوں میں ناکام ہو چکے ہیں۔ وہ چیف منسٹر کے دور میں بھی ناکام رہے ہیں اور اب ایم پی کے طور پر بھی ناکام ہیں۔ قابل ذکر ہے کہ ملائم سنگھ یادو کی دوسری بیوی سادھنا گپتا ہیں۔ ان کے بیٹے پرتیک یادو کی شادی اپرنا یادو سے ہوئی ہے۔ اپرنا یادو نے 2017 کا اسمبلی الیکشن لکھنؤ کینٹ حلقہ سے لڑا تھا۔ایسی اطلاعات ہیں کہ اپرنا کے بعد اکھلیش کے ایک اور رشتہ دار بھگوا ٹولے میں شامل ہونگے۔