دو الگ الگ مقامات پر ایس او ٹی بھونگیر کی کارروائی
حیدرآباد۔ملاوٹی اور ناقص بیج اور فرٹیلائزر تیار کرنے والوں کے خلاف کارروائی کرتے ہوئے ایس او ٹی بھونگیر نے دو افراد کو گرفتار کرلیا۔ ایس او ٹی نے حیات نگر پولیس اور محکمہ اگریکلچرل کے عہدیداروں کے ساتھ مشترکہ کارروائی میں دو بڑے ٹھکانوں کوبے نقاب کیا۔ یہ دو افراد جو الگ الگ کارروائی میں گرفتار کرلئے گئے ۔ پولیس نے حیات نگر کے مضافات میں ترور کے قریب ایک گودام پر دھاوا کرتے ہوئے 24 سالہ بی نریندر ریڈی کو گرفتار کرلیا جو اکاریہ کراپ سائیٹس کے نام سے کاروبار کررہا تھا۔ خام اشیاء کو حاصل کرنے کے بعد یہ شخص اس میں مبینہ طور پر بیجوں اور یوریا میں ملاوٹ کرتا تھا اور نئی پیاکنگ کے بعد اسے کسانوں کو فروخت کررہا تھا جس کی کوئی مسلمہ حیثیت نہیں ہے۔ پولیس نے ایک گودام سے 7 لاکھ روپئے مالیتی کثیر مقدار والی اشیاء کو ضبط کرلیا۔ جبکہ دوسری کارروائی میں بھونگیر زون اسپیشل آپریشن ٹیم نے بھونگیر رورل پولیس حدود میں کارروائی انجام دی اور کسانوں کو فروخت کئے جارہے ملاوٹی بیج اور کھاد کے گودام کو بے نقاب کرتے ہوئے 46 سالہ اے وینکٹ نرسیا کو گرفتارکرلیا۔ پولیس نے بتایا کہ اس کے گودام سے 67 ہزار 460 روپئے مالیتی اشیاء کو ضبط کرلیا جو بغیر سرکاری اجازت اور لائسنس حاصل کئے کاروبار کررہا تھا اور ملاوٹ کرتے ہوئے بیجوں کو فروخت کررہا تھا جس کی کوئی مسلمہ حیثیت نہیں تھی ۔ محکمہ اگریکلچرل کے عہدیداروں نے پولیس کے ساتھ ان تمام اشیاء کو ضبط کرلیا اور پولیس نے انہیں گرفتار کرلیا۔
