ملتان: پاکستان کے ساتھ جاری دوسرے ٹسٹ پر آج ویسٹ انڈیز کی گرفت مضبوط ہوگئی، جیسا کہ 254 رنز کے ٹارگٹ کے تعاقب میں پاکستانی ٹیم کے 4 کھلاڑی 76 رنز پر آؤٹ ہوگئے ہیں۔ ملتان کرکٹ اسٹیڈیم میں 2 ٹسٹ کی سیریز کے آخری میچ کے دوسرے روز ویسٹ انڈیز کی ٹیم دوسری اننگز میں 244 رنز بناکر آؤٹ ہوگئی اور پاکستان کو جیت کیلئے 254 رنز کا ٹارگٹ دیا۔ پاکستان نے دوسری اننگز کا آغاز کیا تو کپتان شان مسعود 2 رنز بنانے کے بعد 3 رنز کے مجموعی اسکور پر کیون سنکلیئر کی گیند پر ایل بی ڈبلیو ہوگئے۔ اگلے اوور میں محمد ہریرہ بھی 2 رنز بنانے کے بعد گوداکیش موتی کی گیند پر ایل بی ڈبلیو ہوگئے، کامران غلام بھی 19 رنز بناکر پویلین لوٹ گئے، جومل وریکین کی گیند پر عامر جنگو نے ان کا کیچ لیا۔ پاکستان کو تجربہ کار بلے باز بابراعظم سے امیدیں تھیں کہ وہ اس مشکل صورتحال میں ذمہ داری کا مظاہرہ کریں گے لیکن سابق کپتان کی ناکامیوں کا سلسلہ تھم نہ سکا اور وہ صرف 31 رنز کے مہمان ثابت ہوئے۔ ویسٹ انڈیز کی جانب سے سنکلیئر نے 2 جبکہ وریکین اور موتی نے ایک ایک وکٹ حاصل کی۔ پہلی اننگز میں 6 وکٹیں لینے والے نعمان علی نے دوسری اننگز میں 4 کھلاڑیوں کو پویلین کی راہ دکھائی۔ ساجد خان نے بھی 4 کھلاڑیوں کو آؤٹ کیا جبکہ ابرار احمد اور کاشف علی کے حصے میں ایک ایک وکٹ آئی۔ ویسٹ انڈیز کے اوپنرز نے دوسری اننگز میں مشکل بیٹنگ وکٹ پر ٹیم کو 50 رنز کا عمدہ آغاز فراہم کیا۔ کپتان کریگ بریتھویٹ نے 52 رنز کی شاندار اننگز کھیلی جبکہ عامر جنگو نے بھی 30 رنز بنائے۔ اس کے بعد نعمان علی نے 4 وکٹیں لے کر میچ دلچسپ بنادیا۔ تاہم پہلی اننگز میں ذمے دارانہ بلے بازی کا مظاہرہ کرنے والے ٹیل اینڈرز ایک بار پھر وکٹ پر جم گئے۔ وکٹ کیپر ٹیون ایمالاچ اور گیندبازسنکلیئر نے 51 رنز کی شراکت قائم کی ۔ سنکلیئر 28 رنز بنانے کے بعد ساجد کی گیند پر کلین بولڈ ہوگئے۔ ویسٹ انڈیز نے دوسری اننگز میں 244 کے بعد پہلی اننگز میں 9 رنز کی برتری کی بدولت 254 رنز کا ٹارگٹ مقرر کیا ہے۔
