نئی دہلی۔ 5 اگسٹ ۔(سیاست ڈاٹ کام) حکومت نے ریاست جموں وکشمیر کی خصوصی ریاست کی حیثیت سے متعلق آئین کے آرٹیکل 370 کو منسوخ کرنے کے حکومتی فیصلے کے تناظر میں کسی بھی ناخوشگوار واقعے کی روک تھام کیلئے تمام ریاستوں اور مرکزی خطوں میں تمام سکیورٹی اور قوانین نافذ کرنے والی ایجنسیوں کو زیادہ مستعدی برتنے کیلئے کہا ہے ۔ وزارت داخلہ نے تمام ریاستوں اور مرکزی خطہ کو مرسلہ مشاورت میں تمام سکیورٹی ایجنسیاں اور قانون نافذ کرنے والے اداروں کو پوری طرح سے چوکس رہنے اور امن و ہم آہنگی کو برقرار رکھنے کیلئے کہا ہے ۔ تمام ریاستوں کے چیف سکریٹریوں اور پولیس چیف کو مشورہ دیا گیا ہے کہ وہ فرقہ وارانہ طور پر حساس علاقوں پر کڑی نگرانی رکھیں۔جموں و کشمیر کے عوام اور وہاں سے بھی ملک کے مختلف حصوں میں آنے والے طلباء کی حفاظت کو یقینی بنانے کیلئے خصوصی توجہ دینے کو کہا گیا ہے ۔ میڈیا خصوصا سوشل میڈیاکے ذریعہ پھیلائی جانے والی افواہوں اور غیر مصدقہ خبروں کو روک تھام اور امن و یکجہتی کو بگاڑنے اور فرقہ وارانہ کشیدگی کو ہوا دینے والی جیسی حرکتوں پر سخت نظر رکھے ۔
