نئی دہلی: بیرون ملک میں کوویڈ انفیکشن کے بڑھتے ہوئے معاملات کے پیش نظر، ملک میں کورونا وبا سے نمٹنے کی تیاریوں کو جانچنے کیلئے منگل کو ضلعی سطح پر ماک ڈرل کی گئی۔مرکزی وزیر صحت اور خاندانی بہبود کے منسکھ مانڈویہ فرضی مشق کو دیکھنے کیلئے نئی دہلی کے صفدر جنگ اسپتال پہنچے ۔ انہوں نے تمام تیاریوں کے ہموار کام کو دیکھا اور ضروری ہدایات دیں۔انہوں نے کہا کہ کوویڈ سے نمٹنے کیلئے آلات، ادویات اور انسانی وسائل کے ساتھ تیار رہنا بہت ضروری ہے ۔ انہوں نے کہا کہ وبا سے بچنے کیلئے ضروری ہے کہ کوویڈ کے معیارات پر عمل کیا جائے اور گمراہ کن معلومات سے گریز کیا جائے ۔کوویڈ فرضی مشق کا مقصد ماضی کے تجربے کی بنیاد پر وبا سے نمٹنے کی تیاریوں کو جانچنا ہے ۔ یہ فرضی مشق ملک بھر میں ضلع سطح پر کی گئی۔ اس میں اس بات کو یقینی بنایا گیا کہ کوویڈ سے نمٹنے کیلئے خصوصی کوویڈ اسپتال، بستر، ادویات، آکسیجن کی دستیابی اور فراہمی، وینٹی لیٹرز اور ایمبولینسز ہموار حالت میں ہیں۔ مرکزی حکومت کی طرف سے کوویڈ۔19 فرضی مشق کے بارے میں جاری کردہ ہدایات کے مطابق، یہ پورا عمل ڈسٹرکٹ مجسٹریٹ، پولیس افسر اور صحت کے افسران کی جسمانی موجودگی میں کیا گیا۔ اس کے تحت طبی مائع آکسیجن کی دستیابی اورفراہمی نیز متعلقہ آلات کو خاص طور پر جانچا گیا۔قبل ازیں کل دیر شام مانڈویہ نے طبی برادری سے کوویڈ سے نمٹنے میں مدد کرنے کا مطالبہ کیا اور کہا کہ وبائی امراض کے بارے میں غلط فہمیوں اور غلط معلومات کو دور کیا جانا چاہیے ۔ انہوں نے کہا کہ کوویڈ کے حوالے سے معاشرے میں پائی جانے والی غلط فہمیوں اور غلط معلومات کو دور کیا جانا چاہئے ۔مرکزی وزیر نے کہاکہ چوکنا رہنا، کوویڈ کے اصولوں پر عمل کرنا اورغیرتصدیق شدہ معلومات سے دور رہنا ضروری ہے ۔
