عام زندگی مفلوج، ہماچل پردیش میں 134 سڑکیں بند
نئی دہلی :پورے ملک میں اب شدید سردی کا قہر جاری ہے۔ دہلی کے زیادہ ترعلاقوں میں دھند اور کہرا ہے۔ محکمہ موسمیات کے مطابق آج سے اگلے کچھ دنوں میں ہلکی بارش ہونے کے بھی آثار ہیں۔ محکمہ نے سردی میں اضافہ کے پیش نظر لوگوں کو احتیاط برتنے کی ہدایت دی ہے۔ادھر اتر پردیش میں آگرہ، علی گڑھ، متھرا اور ورندا ون میں بھی شدید کہرا دیکھنے کو ملا۔محکمہ موسمیات نے کہرے اور بارش کا الرٹ جاری کیا ہے۔ راجستھان کے زیادہ تر علاقوں میں سخت سردی پڑ رہی ہے۔ گزشتہ 24 گھنٹے میں مشرقی راجستھان میں ایک جگہ ہلکی بارش ہوئی جبکہ شدید کہرا بھی چھایا رہا۔ ادئے پور، اجمیر، کوٹا، جے پور، بھرت پور اور بیکانیر میں شدید کہرا رہنے کا امکان ہے۔ وہیں اونچائی والے ہمالیائی علاقوں میں برفباری شروع ہو چکی ہے جبکہ نچلی علاقوں میں گھنے بادلوں نے ڈیرہ ڈال رکھا ہے۔ شدید سردی کی وجہ سے منسیاری کا کم سے کم درجہ حرارت منفی 2 ڈگری پہنچ چکا ہے جس سے یہاں کی روزمرہ کی زندگی بْری متاثر ہو چکی ہے۔وہیں ہماچل میں برفباری کا سلسلہ جاری ہے۔ ریاست کے کئی ضلعوں میں برفباری کے بعد تین قومی شاہراہوں سمیت کْل 134 سڑکیں بند کر دی گئی ہیں۔گزشتہ 24 گھنٹوں میں کوکسر میں 5.6 سینٹی میٹر برفباری ہوئی، جس کے بعد کم سے کم درجہ حرارت میں کچھ ڈگری کی گراوٹ آئی اور لوگ شدید ٹھنڈ کی وجہ سے کپکپاتے رہے۔ اس کے علاوہ کھدرالا اور شلارو میں 5 سینٹی میٹر، پوہ میں 2 سینٹی میٹر، سانگلا میں 1?2 سینٹی میٹر اور کیلونگ، گونڈلا اور جوت میں 1 سینٹی میٹر برفباری ہوئی۔ لاہول اور اسپیتی ضلع کا تابو ہماچل پردیش کا سب سے ٹھنڈا مقام رہا۔ رات کا درجہ حرارت صفر سے 10.6 ڈگری سیلسیس سے نیچے درج کیا گیا ۔جموں و کشمیر میں 40 دنوں کا چلّے کلاں شروع ہونے سے سردی کا قہر بڑھ گیا ہے۔ چلّے کلاں شروع ہونے کے چوتھے دن شدید ٹھنڈ نے لوگوں کا جینا محال کر دیا ہے۔ وادی میں درجہ حرارت نقطہ انجماد سے کئی ڈگری نیچے جا چکا ہے۔ محکمہ موسمیات کے مطابق پہلگام میں کم سے کم درجہ حرارت منفی 7.8 ڈگری سیلسیس کے ساتھ وادی کا سب سے ٹھنڈا علاقہ بنا رہا۔