اموات کی مجموعی تعداد 2649 ہوگئی۔ مہاراشٹرا 28 ہزار مریضوں کیساتھ بدترین متاثرہ ریاست، گجرات دوسرے مقام پر
نئی دہلی15مئی (سیاست ڈاٹ کام ) ملک میں کورونا وائرس (کووڈ -19) کا قہر عروج پر ہے اور اب یہ سب سے ز ائد کیسز کی تعداد والے ممالک کی فہرست میں 12 ویں مقام کے ساتھ ہی عالمی وبا کے مرکز چین کے قریب پہنچ گیا ہے ۔ گزشتہ 24 گھنٹوں میں کورونا وبا کے 3967 نئے کیسز سامنے آنے سے متاثرین کی تعداد 81,970ہو گئی اور اسی دوران 100 افراد کی ہلاکت سے ہلاک ہونے والوں کی تعداد 2649 تک پہنچ گئی ہے ۔مرکزی وزارت برائے صحت اور خاندانی بہبود کی جانب سے جمعہ کی صبح جاری اعداد و شمار کے مطابق ملک کی مختلف ریاستوں اور مرکز کے زیر انتظام علاقوں میں اب تک 81،970 افراد کورونا وائرس سے متاثر ہوئے ہیں اور 2649 ہلاک ہوئے ہیں جبکہ 27920 افراد اس وبا سے پوری طرح صحت یاب ہوئے ہیں اور انہیں مختلف اسپتالوں سے فارغ کر دیا گیاہے ۔چین میں صوبہ ہوبئی کے ووہان میں دسمبر 2019 کے وسط میں کورونا وا ئرس کا پہلا معاملہ سا منے آیا تھا اور اس نے اب تک دنیا بھر کے کئی ممالک کو اپنی گرفت میں لے لیا ہے ۔ چین میں ہی اب تک 82933 افراد اس وبا سے متاثرہ ہوئے ہیں اور 4633 افراد ہلاک ہوئے ہیں ۔ ملک میں کورونا سے سب سے ز ائد مہاراشٹر متاثر ہوا ہے اور اس کی وجہ سے ریاست کی حالت مسلسل بگڑ رہی ہے ۔ مہاراشٹر میں 27524 افراد اس کی گرفت میں آ چکے ہیں اور 1019 ہلاک ہو چکے ہیں اور 6059 مریض اس صحت یاب بھی ہوئے ہیں ۔ کورونا وائرس سے متاثر ہونے کے معاملے میں ملک کی جنوبی ریاست تمل ناڈو دوسرے مقا م پر ہے ۔ تمل ناڈو میں اب تک 9674 افراد اس وبا سے متاثرہ ہوئے ہیں اور 66 اموات ہوئی ہیں جبکہ 2240 افراد کو علاج کے بعد مختلف اسپتالوں سے فارغ کردیا گیا ہے ۔ گجرات میں بھی کووڈ -19 متاثرین کی تعداد 9591 ہو گئی ہے اور اس وبا سے 586 افراد ہلاک ہوچکے ہیں ۔
اس کے علاوہ 2753 افراد اس وبا سے صحت یاب بھی ہوئے ہیں ۔قومی دارالحکومت دہلی کی بھی صورتحال اس جان لیوا وائرس کی وجہ سے تشویشناک بنی ہوئی ہے ۔ یہاں متاثرین کی تعداد آٹھ ہزار سے زائد ہو گئی ہے ۔ دہلی میں اب تک 8470 افراد متاثر ہوئے ہیں اور نو مریضوں کی ہلاکت کے ساتھ ہلاک شدگان کی تعداد 115 تک پہنچ گئی ہے اور 3045 افراد کو علاج کے بعد اسپتالوں سے فارغ کر دیا گیا ہے ۔ راجستھان میں بھی کوروناوائرس تیزی سے پھیل رہا ہے ۔ یہاں کورونا متاثرین کی تعداد 4534 تک ہو گئی ہے اور 125 ہلاک ہوئے ہیں ، جبکہ 2580 افراد صحت یاب بھی ہوئے ہیں ۔ ملک کی سب سے بڑی ریاست اتر پردیش میں اب تک 3902 افراد اس کی گرفت میں آئے ہیں اور اس وبا سے ہلاک ہونے والوں کی تعداد 88 ہو گئی ہے ، 2072 افراد اب تک صحتیاب ہوئے ہیں ۔مغربی بنگال میں 2377 افراد کورونا وائرس سے متاثر ہوئے ہیں اور 215 افراد ہلاک ہو چکے ہیں اور اب تک 768 افراد صحت یاب بھی ہوئے ہیں ۔ تلنگانہ میں اب تک کورونا سے 1414 افراد متاثر ہوئے ہیں ۔ ریاست میں جہاں کورونا سے 34 جانیں تلف ہوئی ہیں ، وہیں 950 افراد اب تک صحت یاب بھی ہوئے ہیں ۔