حیدرآباد15جولائی(سیاست نیوز )شہرکے ملک پیٹ علاقہ میں فائرنگ کا واقعہ پیش آیاجس میں بیوی اوربیٹی کی آنکھوں کے سامنے سی پی آئی لیڈر چندو نائیک کو گولی مارکرہلاک کردیاگیا۔ تفصیلات کے مطابق ملک پیٹ پولیس اسٹیشن کے شالی واہنا نگرپارک میں چہل قدمی کے دوران تین تاچار نامعلوم افراد نے جو کارمیں پہنچے تھے چندو نائک کی آنکھوں میں مرچ کا پاوڈرپھینک دیا اورپھر ان پر6راونڈ فائرنگ کرکے وہاں سے فرارہوگئے۔اس فائرنگ کے نتیجہ میں چندو نائک موقع پر ہی ہلاک ہوگئے۔مہلوک کی شناخت ناگرکرنول ضلع کے اچم پیٹ سے تعلق رکھنے والے 43سالہ چندونائیک کے طورپر کی گئی ہے۔وہ سی پی آئی کے ریاستی کونسل رکن تھے اورملک پیٹ کے ماروتی نگرمیں مقیم تھے۔وہ پارک میں اپنی بیوی اور بیٹی کے ساتھ چہل قدمی کے لئے آئے تھے کہ منگل کی صبح تقریبا7.30بجے اچانک پیش آئے فائرنگ کے اس واقعہ سے پارک آنے والے دیگرافراد میں سنسنی پھیل گئی۔کئی افراد فائرنگ کی آواز سن کراپنی جان بچانے کے لئے دوڑپڑے۔اطلاع ملتے ہی پولیس وہاں پہنچی جس نے نعش کو پوسٹ مارٹم کے لئے بھیج دیا۔پولیس سی سی ٹی وی فوٹیج کی بنیاد پر حملہ آوروں کی شناخت کی کوشش کررہی ہے۔ پولیس کو شبہ ہے کہ اراضی کا تنازعہ قتل کی وجہ ہے۔پولیس کی فارنسک ٹیم شواہد اکٹھا کرنے کیلئے وہاں پہنچ گئی۔ذرائع کے مطابق،مقتول کی اہلیہ نے دیورپلا سے تعلق رکھنے والے سی پی آئی (ایم ایل) لیڈرراجیش پر شک ظاہر کیا ہے۔ان کا کہنا ہے کہ چندو نائیک کے قتل میں راجیش کے ملوث ہونے کا انہیں شبہ ہے۔ پولیس نے اس بیان کو اہم ثبوت کے طور پر لیتے ہوئے تحقیقات کا دائرہ وسیع کر دیا ہے اور راجیش کے کردار کی باریکی سے جانچ کی جا رہی ہے۔پولیس کا کہنا ہے کہ مختلف زاویوں سے کیس کی تحقیقات جاری ہے اور جلد ہی حقائق منظر عام پر لائے جائیں گے۔باوثوق اطلاعات کے مطابق قتل کے بعد قاتلوں نے پولیس میں خودسپردگی اختیار کرلی جن میں راجیش ، شیواکے علاوہ دیگر شامل ہیں۔ تاہم پولیس نے اس کی توثیق نہیں کی۔بتایا جاتا ہے کہ مقتول کے بشمول چار افراد ایک قتل کے مقدمہ میں ملوث تھے ۔ع
