جموں: جموں وکشمیر پردیش کانگریس کمیٹی کے قائم مقام صدر رمن بھلہ کا کہنا ہیکہ بھارت کی ترقی میں کانگریس پارٹی کا بہت بڑا رول ہے ۔ انہوں نے کہا کہ یہ بات یقینی ہیکہ کانگریس کی آئیڈیالوجی سے ہی ملک آگے بڑھنے میں کامیاب ہوا ہے ۔ موصوف قائم مقام صدر نے ان باتوں کا اظہار منگل کے روز یہاں پارٹی کے یوم تاسیس کی مناسبت سے منعقدہ ایک تقریب کے حاشئے پر نامہ نگاروں کے ساتھ بات کرنے کے دوران کیا۔ انہوں نے کہا کہ آج اگر بھارت مضبوطی کی طرف جا رہا ہے تو اس میں کانگریس کا بہت بڑا ہاتھ ہے ایسا نہیں ہے کہ بھارت پچھلے سات برسوں کے دوران آگے بڑھا ہے ’۔ ان کا کہنا تھا کہ ملک کے پہلے وزیر اعظم جواہر لعل نہرو کے اقتدار سنبھالنے کے ساتھ ہی تمام شعبوں میں ترقی ہونا شروع ہوئی تھی۔
