نئی دہلی: ملک کی کئی ریاستیں شدید گرمی کی زد میں ہیں۔ مدھیہ پردیش، اڈیشہ، راجستھان، یوپی، بہار، جھارکھنڈ، پنجاب، ہریانہ اور مہاراشٹرا سمیت کئی ریاستوں میں درجہ حرارت 40 ڈگری سے تجاوز کر گیا ہے۔ وہیں، دہلی۔این سی آر میں آج درجہ حرارت 40 ڈگری سیلسیس سے تجاوز کر گیا۔محکمہ موسمیات کے جمعہ کو جاری کردہ اعداد و شمار کے مطابق مہاراشٹرا کے کم از کم 10 اضلاع میں اپریل کے وسط میں زیادہ سے زیادہ درجہ حرارت 40 ڈگری سیلسیس سے زیادہ ریکارڈ کیا گیا ہے۔محکمہ موسمیات کے مطابق دہلی۔این سی آر کے لوگوں کو زبردست گرمی کا سامنا کرنا پڑ سکتا ہے۔ بہار میں مغربی ہوا اور سورج تپش کی وجہ سے اپریل کے مہینے میں ہی زیادہ سے زیادہ درجہ حرارت 40 ڈگری سیلسیس کے قریب پہنچ گیا ہے۔ درجہ حرارت میں اضافے سے عوام کی مشکلات میں اضافہ ہو گیا ہے۔ دریں اثنا، محکمہ موسمیات نے درجہ حرارت میں مزید اضافے کی پیش قیاسی کرتے ہوئے 15 اپریل سے لو چلنے کا انتباہ جاری کیا ہے۔ یہاں گرمی کی لہر کو دیکھتے ہوئے پٹنہ ضلع انتظامیہ نے اسکولوں کے اوقات میں تبدیلی کی ہدایت دی ہے۔
