ممبئی۔26؍جولائی ( ایجنسیز) پولیس کنٹرول روم کو یکے بعد دیگرے تین الگ الگ نمبروں سے آئے دھمکی بھرے فون سے ہنگامہ مچ گیا۔ فون کرنے والے نے دعویٰ کیا کہ ممبئی انٹرنیشنل ایئر پورٹ پر بم رکھا ہے اور کچھ ہی دیر میں زوردار دھماکہ ہونے والا ہے۔ اس کے بعد ایئر پورٹ میں موجود سیکوریٹی اہلکار مستعد ہو گئے اور پورے احاطے میں تلاشی مہم شروع کر دی گئی۔ اس تلاشی میں کچھ بھی مشتبہ چیزملنے کی اطلاع نہیں ہے۔ایک افسر نے بتایا کہ پولیس کو جمعہ کی دیر رات چھترپتی شیواجی مہاراج بین الاقوامی ہوائی اڈے کے ٹرمینل 2 پر دھمکی بھرا فون آیا۔ اس دھمکی کے بعد پورے ہوائی اڈہ احاطے میں افرا تفری مچ گئی۔ ہوائی اڈہ انتظامیہ نے الرٹ جاری کرتے ہوئے تلاشی مہم شروع کر دی جو تین گھنٹے تک چلی۔ حالانکہ جانچ میں کچھ بھی مشتبہ نہیں ملا اور ممبئی پولیس کے کنٹرول روم میں آیا یہ فون کال فرضی اور یہ دھمکی افواہ ثابت ہوئی۔ افسر نے بتایا کہ ایک اور کال بھی آیا تھا جس میں دعویٰ کیا گیا کہ دھماکہ شام 6.15 بجے ہوگا۔ جانچ میں پتہ چلا کہ دونوں فون ایک ہی شخص نے کیے تھے۔ اس کے خلاف معاملہ درج کرکے آگے کی کارروائی کی جا رہی ہے۔
ایک دیگر افسر نے بتایا کہ ریلوے پولیس کے کنٹرول روم کو بھی چھترپتی شیواجی مہاراج ٹرمینس پر دھماکہ ہونے کا دھمکی بھرا فون آیا تھا حالانکہ بم ڈسپوزل دستے اور ڈاگ اسکواڈ کے ذریعہ گہری جانچ کے بعد یہ بھی ایک فرضی فون کال ثابت ہوا۔ابتدائی جانچ میں سامنے آیا ہے کہ یہ دھمکی بھرے کال آسام اور مغربی بنگال سرحد کے پاس فعال موبائل نمبروں کا استعمال کرکے کیے گئے تھے۔ ممبئی کی آزاد میدان پولیس نے نامعلوم فون کرنے والے کے خلاف جانچ شروع کر دی ہے۔