ممبئی۔ 22 اپریل (سیاست ڈاٹ کام)حکومت مہاراشٹرا نے اخبارات اور رسائل کی ہاکرس کے ذریعے ترسیل پر عائد پابندی کو واپس لے لیا ہے ۔ چیف سیکریٹری اجئے مہتا نے ایک نئے حکم نامہ کے ذریعے 17 اپریل سے اخبارات و رسائل کی گھر گھر ترسیل پر پابندی کو ختم کرنے کا اعلان کیا ہے ۔تاہم اخبارات و رسائل کی گھر گھر ترسیل کے دوران ہاکرس کو تمام احتیاطی تدابیر، ماسک لگنا، ہاتھوں پر سینٹائززس کا استعمال اور مخصوص جسمانی فاصلہ برقرار رکھنا ہوگا۔واضح رہے کہ مرکزی حکومت نے اخبارات کی اشاعت کو جاری رکھنے کی اجازت دی ہے ، تاہم مہاراشٹر میں حکومت نے کووڈ۔ 19 کے پھیلاؤ کو روکنے کی مقصد سے اخبارات و رسائل کی گھروں گھر ترسیل پر پابندی لگائی تھی جس پر پرنٹ میڈیا کی جانب سے سخت اعتراض اٹھایا گیا۔ نیز ممبئی ہائی کورٹ کی اورنگ آباد بینچ نے بھی اس پر ناراضگی جتاتے ہوئے اس کے خلاف سو موٹو ایکشن لیا۔ اور عوامی مفاد کی ایک رٹ پٹیشن داخل کرکے ریاست کے محکمہ انتظامی امور کے پرنسپل سیکریٹری کو 24 اپریل تک قابل واپسی نوٹس جاری کئے ہیں۔
