نئی دہلی۔ پٹرول اور ڈیزل کی قیمتوں میں ہفتہ کے روز ایک بار پھر اضافہ کیا گیا جس سے ملک کے تجارتی دارالحکومت ممبئی میں پہلی بار پٹرول کی قیمت 100 روپے فی لیٹر کو عبور کر گئی۔دہلی اور کولکتہ میں بھی پٹرول 94 روپے فی لیٹر کے قریب پہنچ گیا ہے ، جبکہ ممبئی میں ڈیزل92 روپے فی لیٹر ہوگیا ۔ معروف آئیل مارکیٹنگ کمپنی انڈین آئیل کارپوریشن کی ویب سائٹ کے مطابق ممبئی میں آج پٹرول کی قیمت 25 پیسے اضافے سے 100.19 روپے فی لیٹر ہوگئی۔ یہ پہلا موقع ہے جب کسی بڑے شہر میں یہ 100 روپے سے اوپر پہنچ گیا ہے ۔ ڈیزل کی قیمت بھی 30 پیسے اضافے کے بعد 92.17 روپے فی لیٹر کی تاریخی بلند ترین سطح پر پہنچ گئی۔قومی دارالحکومت میں پٹرول 26 پیسے اور ڈیزل 27 پیسے مہنگا ہوگیا۔ آج ایک لیٹر پٹرول کی قیمت 93.94 روپے اور ڈیزل کی قیمت 84.89 روپے فی لیٹر تھی۔گزشتہ 04 مئی سے اب تک ان کی قیمتوں میں 15 مرتبہ اضافہ کیا گیا ہے ، جبکہ ان کی قیمتوں میں 11 دن کوئی تبدیلی نہیں کی گئی ہے ۔ اس دوران دہلی میں پٹرول 3.54 روپے اور ڈیزل 4.15 روپے مہنگا ہوچکا ہے ۔
