مبئی : ممبئی میں یہودی کمیونٹی سینٹر چابڈ ہاؤس پر ایک بار پھر دہشت گرد حملے کا خطرہ ہے۔راجستھان میں حملے کی منصوبہ بندی کرنے کے الزام میں گرفتار دو مشتبہ دہشت گردوں سے چابڈ ہاؤس کی گوگل امیج برآمد ہونے کے بعد ممبئی پولیس نے قلابہ میں چابڈ ہاؤس کے باہر سیکورٹی بڑھا دی ہے۔ قابل ذکر بات یہ ہے کہ چابڈ ہاؤس 2008 میں ممبئی میں 26؍11 کے دہشت گردانہ حملے کے ہدف میں سے ایک تھا۔ دونوں دہشت گرد راجستھان میں بھی دہشت گردانہ حملوں کی منصوبہ بندی کر رہے تھے۔ 2008 میں ممبئی میں 26؍11 کے دہشت گردانہ حملے میں چابڈ ہاؤس کو بھی نشانہ بنایا گیا تھا۔ خبر رساں ایجنسی اے این آئی کی رپورٹ کے مطابق 18 جولائی کو پونے پولیس نے دو دہشت گردوں محمد عمران یوسف خان (23) اور محمد یونس محمد یعقوب ساکی (24) کو موٹر سائیکل چوری کے الزام میں گرفتار کیا تھا۔ تفتیش کے دوران پتہ چلا کہ دونوں قومی تحقیقاتی ایجنسی (این آئی اے) کی مطلوبہ فہرست میں شامل ہیں۔
