کے چندر شیکھر راؤ ، جگن موہن ریڈی ، زاہد علی خاں اور دیگر شخصیتوں کا خراج عقیدت
حیدرآباد ۔ 5 ۔ مارچ : ( سیاست نیوز ) : متحدہ ریاست آندھرا پردیش کے ممتاز تلگو صحیفہ نگار و سابق صدر نشین متحدہ آندھرا پردیش پریس اکیڈیمی مسٹر پی وینکٹیشور راؤ کی مختصر سی علالت کے باعث آج موت واقع ہوگئی ۔ 86 سالہ مسٹر وینکٹیشور راؤ 8 فروری 1934 میں ریاست آندھرا پردیش کے ضلع گنٹور میں واقع موضع پوتور میں پیدا ہوئے اور سال 1957 میں تلگو اخبار آندھرا جنتا سے اپنی صحافتی زندگی کا آغاز کر کے تلگو شعبہ صحافت میں اپنا ایک منفرد مقام حاصل کیا ۔ بلکہ متحدہ ریاست آندھرا پردیش سے شائع ہونے والے نامور تلگو اخبارات ایناڈو ، آندھرا بھومی ، آندھرا پربھا اور اودئیم میں اپنی گرانقدر خدمات انجام دیں ۔ بالخصوص تلگو روزنامہ آندھرا پربھا کے ایڈیٹر کی حیثیت سے طویل مدت تک خدمات انجام دیں اور بعد ازاں وہ صدر نشین پریس اکیڈیمی متحدہ ریاست آندھرا پردیش کی حیثیت سے تلگو جرنلزم کو فروغ دینے میں مسٹر وینکٹیشور راؤ نے اپنا اہم رول ادا کیا ۔ مسٹر پوتوری وینکٹیشور راؤ زائد از پانچ دہوں تک شعبہ صحافت سے وابستہ رہے اور آج ان کی موت واقع ہونے کی اطلاع پر چیف منسٹر تلنگانہ مسٹر کے چندر شیکھر راؤ ، چیف منسٹر آندھرا پردیش مسٹر وائی ایس جگن موہن ریڈی سابق چیف منسٹر آندھرا پردیش مسٹر این چندرا بابو نائیڈو ، ریاستی وزراء مسرس ٹی ہریش راؤ ، ای دیاکر راؤ ، جگدیش ریڈی ، اندرا کرن ریڈی وغیرہ نے مسٹر بی وینکٹیشور راؤ کی موت پر اپنے دکھ و افسوس کا اظہار کیا اور ان کی صحافتی خدمات کو بھر پور خراج عقیدت پیش کیا ۔ علاوہ ازیں مسٹر وینکٹیشور راؤ کے مکان واقع متصل عیدگاہ بلالی ہاکی گراونڈ مانصاحب ٹینک پہونچکر مسرس ٹی سرینواس یادو ، وزیر انیمل ہسبنڈری ، سابق ڈپٹی چیف منسٹر مسٹر کے سری ہری ، سکریٹری ریاستی سی پی آئی مسٹر سی وینکٹ ریڈی ، چیف ایڈیٹر روزنامہ سیاست جناب زاہد علی خاں ، ممتاز انقلابی گلوکار غدر ، صدر نشین تلنگانہ میڈیا اکیڈیمی ایم نارائنا ، رکن اسمبلی کرانتی کرن مختلف اخبارات کے ایڈیٹرس ، اعلیٰ عہدیداروں وغیرہ نے نعش کا دیدار کیا اور انہیں بھر پور خراج عقیدت پیش کر کے افراد خاندان کے ساتھ اپنی تعزیت کا اظہار کیا ۔۔
