تعلیم، سماجی خدمت اور اقلیتی طلبہ کی ترقی میں تین دہائیوں پر محیط خدمات کا اعتراف
حیدرآباد۔ 11نومبر ( پریس نوٹ ) حکومتِ تلنگانہ نے معروف ماہرِ تعلیم، بانی و چیرمین ایم ایس ایجوکیشن اکیڈیمی جناب محمد لطیف خان کو اُن کی گراں قدر تعلیمی، سماجی اور فلاحی خدمات کے اعتراف میں مولانا ابوالکلام آزاد نیشنل ایوارڈ برائے 2025ء سے سرفراز کیا۔ یہ ایوارڈ قومی یومِ تعلیم کے موقع پر وزیر اقلیتی بہبود جناب محمد اظہرالدین کے ہاتھوں پیش کیا گیا۔ ممتاز مجاہد ٓازادی اور ملک کے پہلے وزیر تعلیم مولانا ابوالکلام آزاد کے یومِ پیدائش کی مناسبت سے تلنگانہ اردو اکیڈیمی سے ہر سال قومی یوم تعلیم کا انعقاد کرکے اُن افراد کو ’’مولانا ابوالکلام آزاد نیشنل ایوارڈ‘‘ سے نوازا جاتا ہے جنہوں نے تعلیم، اردو زبان و ادب اور سماجی خدمت میں نمایاں خدمات انجام دی ہوں۔ اسی سلسلے کی ایک تقریب منگل11 نومبر رویندرا بھارتی منعقد ہوئی، ۔ سال 2024ء اور 2025ء کیلئے ایوارڈز پیش کیے گئے۔ جناب محمد اظہر الدین، وزیر اقلیتی بہبود و پبلک انٹرپرائزز نے جناب محمد لطیف خان کومولانا ابوالکلام آزاد نیشنل ایوارڈ برائے سال 2025ء پیش کیا۔یہ ایوارڈ 2 لاکھ 25 ہزار روپے نقد رقم، توصیف نامہ اور مومنٹو پر مشتمل ہے۔ محمد لطیف خان کو یہ اعزاز اُن کی تین دہائیوں پر مشتمل تعلیمی، سماجی اور فلاحی خدمات کے اعتراف میں دیا گیا، جن میں اقلیتی طلبہ کی ترقی، اقدار پر مبنی معیاری تعلیم کے فروغ، اور معاشرے کے پسماندہ طبقوں کو قومی دھارے میں شامل کرنے جدوجہد شامل ہے۔ اُن کی قیادت میں ایم ایس ایجوکیشن اکیڈیمی نے نہ صرف تعلیم بلکہ سماجی خدمت کے میدان میں بھی نمایاں کارنامے انجام دیے ہیں۔ ان میں ایم ایس کے وہ فلاحی ادارے شامل ہیں جو اقلیتوں کو مفت تعلیمی و تربیتی خدمات فراہم کرتے ہیں — جیسے ایم ایس آئی اے ایس اکیڈیمی برائے سول سروسز، لطیفی 40 برائے آئی آئی ٹی و میڈیکل تیاری، خواتین کی خود انحصاری کیلئے قائم ذائبس اسکل ڈیولپمنٹ سینٹر برائے بیوہ خواتین، اور ایڈوینچر پارک جیسے جدید منصوبے، جہاں طلبہ کو اسٹارٹ اَپ کلچر، قیادت، اور اختراعی سوچ کی تربیت دی جاتی ہے۔ ان تمام اقدامات نے ہزاروں طلبہ، خواتین، اور نوجوانوں کی زندگیوں میں مثبت تبدیلی پیدا کی اور سماج میں تعلیم، خود اعتمادی اور ترقی کی نئی راہیں روشن کیں۔ تقریب میں محمد علی شبیرمشیر برائے اقلیتی بہبود، بی شفیع اللہ، آئی ایف ایس سکریٹری محکمہ اقلیتی بہبود، طارق انصاری چیرمین اقلیتی کمیشن،فہیم قریشی چیرمین ٹمریز، مولانا سید شاہ افضل بیابانی خسرو پاشاہ صدر نشین حج کمیٹی،محمد عبیداللہ کوتوال چیرمین فینانس کارپوریشن، اور دیپک جان کوکاّڈن چیرمین کرسچین فینانس کارپوریشن شریک رہے۔ اس ایوارڈ کے حصول کے بعد محمد لطیف خان نے تعلیمی اداروں کے پرنسپلس اور ہیڈس آف دی ڈیپارٹمنٹس کو خطاب کرتے ہوئے کہا کہ ان کی زندگی کا اگلہ منصوبہ طلبہ کیلئے افورڈبل ایجوکیشن فراہم کرنا ہے۔ ایم ایس ایجوکیشن اکیڈیمی کی وائس چیرپرسن نزہت خان صوفی، منیجنگ ڈائرکٹرس انور احمدو ڈاکٹر معظم حسین اور جونئر ڈائرکٹرس محمد اویس خان اور محمد الیاس خان نے محمد لطیف خان کو مبارکباد پیش کی۔ اس موقع پرایم ایس ایجوکیشن اکیڈیمی کے مختلف اداروں کے ڈائرکٹرس، پرنسپلس و ہیڈ آف ڈیپارٹمنٹس نے محمد لطیف خان کو مبارکباد پیش کی۔
