نئی دہلی۔8 ستمبر (سیاست ڈاٹ کام ) ہندوستانی ٹیم کے سابق فاسٹ بولرمناف پٹیل پربڑودرہ کرکٹ ہت رکشک سمیتی کے صدردیویندر سورتی نے سنگین الزامات عائد کئے ہیں۔ دیویندرسورتی نے نواپورہ پولیس اسٹیشن میں دی گئی درخواست میں کہا ہیکہ ہندوستانی کرکٹ ٹیم کے سابق کرکٹرمناف پٹیل نے انہیں جان سے مارنے کی دھمکی دی ہے۔ دوسری جانب مناف نے خود پرلگے الزامات کوبے بنیاد بتایا ہے۔ سورتی کے مطابق مناف پٹیل نے جمعرات صبح انہیں بلایا اورجان سیمارنے کی دھمکی دی۔اس پورے معاملے میں نواپورہ پولیس اسٹیشن کے انسپکٹرآرایم چوہان نے کہا ہے کہ ہمیں دیویندرسورتی نے ایک درخواست دی ہے لیکن انہوں نے کوئی شکایت درج نہیں کروائی ہے، اس لئے اس معاملے میں ابھی تک کوئی ایف آئی آردرج نہیں کی گئی ہے۔ کی رپورٹ کے مطابق سورتی نے کہا ہیکہ بڑودرہ کرکٹ اسوسی ایشن میں بدعنوانی کے خلاف لڑائی جاری رکھنے کے سبب انہیں نشانہ بنایا جارہا ہے۔ مناف پٹیل موجودہ وقت میں بڑودرہ کرکٹ اسوسی ایشن کی سینئرٹیم کیمینٹرہیں۔ بڑودرہ کرکٹ ہت رکشک سمیتی کے صدردیویندرسورتی کے مطابق میں نے پولیس میں درخواست دے کرکہا ہیکہ اگرمیرے یا میرے افراد خاندان کے ساتھ کوئی بھی حادثہ ہوتا ہے تواس کیلئے مناف پٹیل کو ذمہ دارٹھہرایا جائے۔ حالانکہ مناف پٹیل نے خود پرلگے سورتی کے الزامات کوپوری طرح مسترد کرتے ہوئے اسے بے بنیاد الزام قراردیا ہے۔ انہوں نے کہا کہ جن باتوں سے سورتی کو پریشانی ہے، اس سے میرا کوئی لینا دینا ہی نہیں ہے۔ مناف پٹیل نے نومبر2018 میں بین الاقوامی کرکٹ سے کنارہ کشی اختیار کی ہے ۔ مناف پٹیل نے کہا ہیکہ مجھے بغیرکسی وجہ کے اس معاملے میں گھسیٹا جارہا ہے۔
