نئی دہلی۔ اسٹار ہندوستانی کھلاڑی سمرتی مندھانا، ہرمن پریت کور اور دیپتی شرما کو 23 مئی سے پونے میں منعقد ہونے والے ویمنز ٹی20 چیلنج کرکٹ ٹورنمنٹ کے لیے تین ٹیموں کی کپتان بنایا گیا ہے ۔کرکٹ بورڈ آف انڈیا (بی سی سی آئی ) نے ہر ٹیم میں 16 کھلاڑیوں کو جگہ دی ہے۔ ہرمن پریت کو سپرنواس، مندھانا کو ٹریل بلزرز اور دیپتی کو ویلوسیٹی کی کمان دی گئی ہے۔ آخری مرتبہ یہ ٹورنمنٹ 2020 میں ہوا تھا جسے ٹریل بلزرز نے جیتا تھا۔ تجربہ کار ہندوستانی کرکٹرز میتھالی راج، جھولن گوسوامی اور شیکھا پانڈے کو کسی بھی ٹیم میں جگہ نہیں ملی ہے۔ نمائشی ٹورنمنٹ میں 12 بیرون ملک کھلاڑی بھی حصہ لیں گے، جن میں جنوبی افریقہ کی اوپنر لورا وولوارٹ اور عالمی نمبر ایک سوفی ایکلسٹون شامل ہیں۔ تھائی لینڈ کے ناتھاکن چنٹم دوسری بار ٹورنمنٹ میں حصہ لیں گے۔ لیگ اسپنر ایلینا کنگ واحد آسٹریلیائی کھلاڑی ہیں جنہوں نے ٹورنمنٹ میں حصہ لیں گی جب کہ انگلینڈ کے کھلاڑیوں میں ایکلیسٹون، صوفیہ ڈنکلے اور کیٹ کراس شامل ہیں۔ بنگلہ دیش کی سلمیٰ خاتون اور شرمین اختر کو بھی منتخب کیا گیا ہے۔ ٹورنمنٹ میں حصہ لینے والی ویسٹ انڈیز کی کھلاڑی ڈینڈرا ڈوٹن اور ہیلی میتھیوز ہیں۔ جنوبی افریقہ کے کپتان سن لوس اور وولوارٹ بالترتیب سپرنواس اور ویلوسیٹی کی نمائندگی کریں گے۔ حال ہی میں ختم ہونے والے سینئر ویمنز ٹی20 ٹورنمنٹ میں اچھی کارکردگی کا مظاہرہ کرنے والی کھلاڑیوں کو ٹیم میں جگہ ملی ہے۔ ٹورنمنٹ کے سب سے کامیاب بیٹر نیوگیرے کے پی اور سب سے کامیاب بولر آرتی کیدار ویلسیٹی کے لیے کھیلیں گی۔ آنے والا سیزن ممکنہ طور پر ویمنز چیلنج کا آخری ٹورنمنٹ ہوگا کیونکہ بی سی سی آئی اگلے سال سے خواتین کے مکمل آئی پی ایل کے انعقاد کا منصوبہ بنا رہا ہے۔
