نئی دہلی ۔ پیرس اولمپکس میں2 برونز میڈلز جیتنے والی شوٹر منو بھاکرکی چاندی ہی چاندی ہوگئی۔ منو بھاکر راتوں رات مختلف برانڈز کے لیے سوپر اسٹار بن گئی ہیں، اولمپک میڈلز جیتنے کے بعد معاہدوں کے لیے 40 برانڈز نے ان سے رابطے کرلیے ہیں اور منو بھاکر کے معاہدے کرنے کی فیس 20 لاکھ سے بڑھ کرکروڑوں میں چلی گئی ہے۔ 22 سالہ منو بھاکر نے 10 میٹر ایئر پسٹل اور مکسڈ ٹیم میں 2 میڈلز جیتے ہیں۔ ایک اسپورٹس کمپنی کی جانب سے کہا گیا ہے کہ اسپانسر شپ معاہدوں کے لیے40 برانڈز نے رابطے کیے ہیں، ہم طویل المدتی معاہدے کرنے کے خواہشمند ہیں اور دو تین معاہدے ہو چکے ہیں۔ اسپورٹس کمپنی نے کہا ہے کہ معاہدہ اب 20 ،25 لاکھ سے ایک سال کے لیے ڈیڑھ کروڑ روپے تک پہنچ گیا ہے۔
