اکتوبر میں شیڈول اور نومبر میں نوٹیفکیشن جاری ہونے کے امکانات، چیف منسٹر کے سی آر کا جائزہ اجلاس
حیدرآباد ۔ 21 ستمبر (سیاست نیوز) چیف منسٹر چندر شیکھر راؤ نے اسمبلی حلقہ منگوڑ میں تلنگانہ راشٹر سمیتی (ٹی آر ایس) کی بھاری اکثریت سے کامیابی کو یقینی قرار دیتے ہوئے سابق رکن اسمبلی کے پربھاکر ریڈی کو امیدوار بنانے کا اشارہ دیا ہے۔ پارٹی کا کہنا ہے کہ منگوڑ اسمبلی حلقہ میں اصل مقابلہ ٹی آر ایس اور کانگریس کے درمیان ہے۔ بی جے پی تیسرے مقام پر ہے۔ چیف منسٹر کے سی آر نے پرگتی بھون میں ضلع نلگنڈہ کے ٹی آر ایس قائدین کا اجلاس طلب کیا اور اسمبلی حلقہ منگوڑ کے ضمنی انتخابات کا جائزہ لیا ۔ اس اجلاس میں ریاستی وزیر برقی جگدیش ریڈی، رکن قانون ساز کونسل ٹی رویندر راؤ، ٹی آر ایس کے ارکان اسمبلی جی کشور، سی لنگیا سابق رکن اسمبلی کے پربھاکر ریڈی کے علاوہ دوسروں نے شرکت کی۔ چیف منسٹر کے سی آر نے بتایا کہ آئندہ ماہ اکتوبر میں اسمبلی حلقہ منگوڑ کے لئے شیڈول جاری ہونے اور نومبر میں ضمنی انتخابات منعقد ہونے کے قوی امکانات ہیں۔ لہذا پارٹی کے قائدین متحرک ہو جائیں اور اتحاد کا مظاہرہ کرتے ہوئے پارٹی امیدوار کو کامیاب بنانے کے لئے خصوصی حکمت عملی تیار کرتے ہوئے کام کریں۔ تمام قائدین منڈل کو ہیڈکوارٹر بناتے ہوئے دیہی علاقوں کے چپہ چپہ میں پھیل جائیں اور عوامی مسائل کی یکسوئی کرتے ہوئے رائے دہی تک عوام سے مسلسل رابطہ میں رہیں۔ حکومت کی فلاحی اسکیمات، ریتو بندھو کے بارے میں زبردست تشہیر کریں اور ساتھ ہی حال ہی میں اعلان کردہ 10 فیصد ایس ٹی تحفظات اور گریجن بندھو اسکیم کے بارے میں بھی عوام میں شعور پیدا کریں۔ دیہی علاقوںمیں پسماندہ طبقات کے ساتھ کھانا کھانے کی اسکیم کا آغاز کریں اور اسمبلی حلقہ کے انچارجس اس کی منصوبہ بندی کریں۔ اس کے علاوہ دوسری پارٹیوں کے قائدین کو بڑے پیمانے پر ٹی آر ایس میں شامل کریں۔ ساتھ ہی پارٹی کے موجودہ قائدین اور پارٹی میں شامل ہونے والے نئے قائدین کے درمیان توازن کو برقرار رکھیں۔ چیف منسٹر کے سی آر نے ریاستی وزیر برقی جگدیش ریڈی کو مشورہ دیا کہ وہ ایسے 500 ہارڈکور ورکرس کو تیار کریں جو گاؤں گاؤں پہنچ کر پارٹی کی تشہیر کریں۔ چیف منسٹر نے کہا کہ تاحال دو گاؤں کے لئے ایک رکن اسمبلی کو ذمہ داری سونپی گئی ہے۔ نوٹیفکیشن کی اجرائی کے بعد چنڈور میں ایک جلسہ عام کا اہتمام کرنے کا بھی فیصلہ کیا گیا ہے۔ کے سی آر نے پارٹی قائدین کو بتایا کہ تمام سروے ٹی آر ایس کے حق میں ہے۔ کانگریس دوسرے اور بی جے پی تیسرے مقام پر ہے۔ منگوڑ کا اسمبلی حلقہ راج گوپال ریڈی کے تلنگانہ راشٹر سمیتی سے استعفی دینے سے خالی ہوا ہے۔ راج گوپال ریڈی نے ٹی آر ایس سے مستعفی ہونے کے بعد بی جے پی میں شمولیت اختیار کرلی ہے۔ ن
