نئی دہلی : دہلی کے سابق نائب وزیر اعلیٰ منیش سیسوڈیا کے لیے پریشانی ختم ہونے کا نام نہیں لے رہی ہے۔ 6 مارچ تک انھیں سی بی آئی کی حراست میں رکھنے کا فیصلہ کیا گیا تھا اور آج انھیں 15 دنوں کے لیے عدالتی حراست میں بھیجنے کا فیصلہ سنایا گیا ہے۔ یعنی منیش سیسوڈیا کی ہولی اب تہاڑ جیل میں گزرے گی۔راؤز ایونیو کورٹ نے آج منیش سیسوڈیا کو 15 روزہ عدالتی تحویل میں دینے کا فیصلہ سنایا۔ سیسوڈیا کو 2 دن کی ریمانڈ کے بعد آج عدالت میں پیش کیا گیا تھا۔سیسوڈیا ابھی تک مجموعی طور پر 7 دنوں کی ریمانڈ پر رہ چکے ہیں۔ دہلی آبکاری پالیسی معاملے میں گرفتاری کے بعد عآپ کے سینئر لیڈر ایک ہفتے سے سی بی آئی کی حراست میں تھے۔ ان کی ضمانت پر سماعت 10 مارچ کو ہونے والی ہے۔واضح رہے کہ منیش سیسوڈیاکو 26 فروری کو 8 گھنٹے کی طویل پوچھ تاچھ کے بعد سی بی آئی نے گرفتار کر لیا تھا۔ 27 فروری کو راؤز ایونیو کورٹ نے سیسوڈیا کو 4 مارچ تک کے لیے سی بی آئی ریمانڈ میں بھیجا تھا تاکہ ان سے پوچھ تاچھ کی جا سکے۔ اس درمیان سیسوڈیا نے سپریم کورٹ میں بھی اپنی ضمانت کے لیے عرضی داخل کی تھی۔ حالانکہ سپریم کورٹ نے اس پر سماعت سے انکار کر دیا تھا۔ پھر سیسوڈیا کو 4 مارچ کو عدالت میں پیش کیا گیا تھا۔ اْس دن جج ایم کے ناگپال نے انھیں مزید 2 دنوں کے لیے سی بی آئی کی حراست میں بھیج دیا تھا۔ سی بی آئی حکام نے تحقیقات میں تعاون نہ کرنے کا سیسوڈیا پر الزام عائد کیا تھا ۔ عدالت میں سی بی آئی کونسل نے کہاکہ ہم فی الحال مزید تحویل کے لئے درخواست نہیں کررہے ہیں۔
