امپھال: منی پوری میں جاری تشدد کے درمیان ریاستی حکومت نے 7 اضلاع میں موبائل انٹرنیٹ پر پابندی کو 3 دنوں کے لیے بڑھا دیا ہے۔ حکومت نے حالات کا جائزہ لینے کے بعد موبائل انٹرنیٹ پر عائد پابندی کو بڑھانے کا فیصلہ لیا۔ امپھال مغرب، امپھال مشرق، کاکچنگ، بشنو پور، تھوبال، چراچندپور اور کانگپوکپی میں آئندہ 3 دنوں تک موبائل انٹرنیٹ بند رہے گا۔منی پور حکومت نے ریاست میں جاری بدامنی کو پیش نظر رکھتے ہوئے انٹرنیٹ خدمات پر پابندی عائد کی تھی۔ واضح رہے کہ منی پور میں حالات نازک بنے ہوئے ہیں۔ فوجی جوانوں کی مہم میں کوکی۔زو طبقہ کے 10 باغیوں کی ہلاکت کے بعد جریبام میں میتئی طبقہ کے 6 لوگوں کی نعشیں ملنے سے پوری ریاست میں زبردست کشیدگی ہے۔
بتایا گیا ہے کہ دہشت گردوں کی طرف سے میتئی طبقہ کی 3 خواتین اور 3 بچوں کا ایک کیمپ سے مبینہ طور پر اغوا کرنے کے بعد انھیں موت کے گھاٹ اتار دیا گیا تھا۔ اس کے بعد سے ہی پورے علاقہ میں تشدد بھڑک اٹھا اور وزیر اعلیٰ این بیرین سنگھ کے داماد سمیت کئی اراکین اسمبلی و لیڈران کے گھروں کو نشانہ بنایا گیا۔منی پور میں کوکی اور میتئی طبقات میں تقریباً ایک سال سے تشدد کا سلسلہ جاری ہے جس میں کئی افراد ہلاک ہوچکے ہیں۔
