دو گھنٹے کی تقریر میں وزیراعظم مسکراتے رہے ،ان کے چہرے پر درد کا کوئی تاثر نہ تھا: راہول گاندھی
نئی دہلی: کانگریس کے لیڈر راہول گاندھی نے منی پور تشدد کیلئے وزیراعظم نریندر مودی پر سیدھا حملہ کرتے ہوئے جمعہ کو کہا کہ وہ پارلیمنٹ میں اور پارلیمنٹ کے باہر بحران کے بارے میں بات نہیں کرنا چاہتے اور اس مسئلے کو سنجیدگی سے نہیں لے رہے جس سے ثابت ہوتا ہے کہ وہ منی پور میں امن بحالی نہیں چاہتے۔ آج یہاں پارٹی ہیڈکوارٹر میں پریس کانفرنس سے خطاب کرتے ہوئے راہول نے کہا کہ مودی لوک سبھا میں جب اپوزیشن پارٹیوں کی تحریک عدم اعتماد پر بحث کا جواب دے رہے تھے تو 2 گھنٹے 13 منٹ کی تقریر میں انہوں نے آخر میں منی پور پر اپنی بات رکھی۔ وہ منی پور کے بارے میں کتنے سنجیدہ ہیں اس بات کا پتہ تقریر کے دوران ان کے چہرے سے صاف نظر آرہا تھا۔ وہ تقریر کے دوران مسکراتے رہے ، ان کے چہرے پر درد کا کوئی تاثر نہیں تھا۔ ایوان میں نعرے لگائے جارہے تھے اور اس سے ثابت ہوتا ہے کہ وہ منی پور میں امن نہیں چاہتے۔ انہوں نے کہا کہ یہ دیکھ کر حیرت ہوتی ہے کہ منی پور جل رہا ہے ، جہاں ایک برادری کے لوگ دوسری برادری کے لوگوں کو مارنے پر آمادہ ہیں، لیکن پارلیمنٹ میں اس معاملے پر ٹھوس بات کرنے کے بجائے مودی کانگریس اور دیگر اپوزیشن جماعتوں اور ان کے قائدین کا نام لیکر ان پر تنقیدیں کررہے تھے۔ اپوزیشن اتحاد اور اس میں شامل جماعتوں پر حملے کرتے رہے، لیکن منی پور کے مسئلہ پر غیرسنجیدگی کا مظاہرہ کرتے ہوئے اس بارے میں کوئی ٹھوس بات نہیں کی۔ کانگریس کے لیڈر نے کہا کہ وزیر اعظم کو سوچنا چاہیے کہ وہ کسی مخصوص خاص پارٹی یا علاقے کے لیڈر نہیں ہیں، بلکہ وہ ملک کے وزیر اعظم ہیں۔ مودی جب بولتے ہیں تو ان کے الفاظ میں وزیر اعظم کی بردباری نظر نہیں آتی۔ ان میں ملک کا لیڈر نظر نہیں آتا۔ جب وہ منی پور جیسے مسئلے پر ہلکی بات کرتے ہیں اور اس سانحے پر بات کرتے ہوئے ہنستے ہیں، تو صاف ظاہر ہوتا ہے کہ وہ منی پور پر غیرسنجیدگی دکھارہے ہیں۔ وہ وہاں امن بحال کرنے کے بارے میں سوچتے بھی نہیں ہیں۔ راہول نے کہا کہ وہ تقریباً دو دہائیوں سے سیاست میں ہیں لیکن منی پور میں جو کچھ ہوا ایسا انہوں نے کبھی نہیں دیکھا۔ جب وہ منی پور گئے تو وہاں کے لوگوں کا المیہ اور حقیقت دیکھی اور اسی لیے انہوں نے کہا کہ منی پور کا قتل کیا جارہا ہے ۔ حالات کو سنبھالنے کیلئے اقدامات نہیں کیے جا رہے ۔ ایک برادری کے لوگ دوسری برادری کے لوگوں کو مارنے کیلئے ہزاروں اسلحہ لوٹ لیتے ہیں، منی پور کے چیف منسٹر کے سامنے سب کچھ ہو رہا ہے لیکن چیف منسٹر کیخلاف مرکز سے کوئی کارروائی نہیں ہوتی ہے۔