میزورم میں کانگریس کی انتخابی مہم کا آغاز‘آج پارٹی قائدین سے ملاقات
ایزال: میزورم میں 7 نومبر کو ہونے والے اسمبلی انتخاب سے پہلے کانگریس لیڈر راہول گاندھی پارٹی کی تشہیر کے لیے پیر کو دو روزہ دورے پرایزال پہنچے۔ وہاں پہنچنے کے فوراً بعد کانگریس رکن پارلیمنٹ نے ریاست کی راجدھانی سے راج بھون تک پد یاترا میں حصہ لیا اور پھر اس کے بعد جلسہ عام سے خطاب کیا۔راہول گاندھی نے عوام سے خطاب کرتے ہوئے منی پور کے واقعات کا تذکرہ کیا اور وزیر اعظم مودی کو تنقید کا نشانہ بنایا۔ راہول گاندھی نے کہا کہ کچھ ماہ پہلے میں منی پور گیا تھا۔ منی پور کے نظریات کو بی جے پی نے تباہ کر دیا ہے۔ اب یہ ایک ریاست نہیں بلکہ دو ریاست ہے۔ لوگوں کا قتل کر دیا گیا ہے، خواتین سے چھیڑ چھاڑ کی گئی ہے لیکن وزیر اعظم کو وہاں سفر کرنا ضروری نہیں لگتا۔بہرحال منگل کے روز راہول گاندھی پہلے ایزال کلب میں ریاست کے پارٹی لیڈران کے ساتھ میٹنگ کریں گے اور پھر لنگلوئی جانے سے پہلے میڈیا کو خطاب کریں گے۔ کانگریس نے حال ہی میں دو مقامی پارٹیوں پیپلز کانفرنس (پی سی) اور زورم نیشنلسٹ پارٹی (زیڈ این پی) کے ساتھ میزورم سیکولر الائنس (ایم ایس اے) کی تشکیل کی ہے۔ریاستی کانگریس صدر لالساوتا نے کہا کہ ایم ایس اے کی تشکیل بی جے پی کے خلاف متحد ہو کر لڑنے کیلئے کی گئی ہے۔ ایم ایس اے کے عزائم میں کہا گیا ہے کہ یہ الزام ہے کہ جب سے بھگوا پارٹی اور اس کے ساتھی 2014 میں مرکز میں اقتدار میں آئے ہیں تب سے اقلیتی طبقات، خصوصاً قبائلیوں کو تباہ کرنے اور کئی قوانین کے ذریعہ ہندو ریاست قائم کرنے کی ٹھوس کوششیں کی گئی ہیں جس پر ایم ایس اے خاموش تماشائی نہیں رہنا چاہتا۔