عوام کی شراکت سے کامیابی ۔ آئندہ بھی نئی جدت سے پروگرام جاری رکھنے کا عزم
نئی دہلی: وزیر اعظم نریندر مودی نے کہا کہ آل انڈیا ریڈیو پر نشر ہونے والے ان کے ماہانہ پروگرام من کی بات کی 116 قسطیں نشر ہو چکی ہیں اور یہ خوشی کی بات ہے کہ اس سے لوگوں میں نئی توانائی پیدا ہو رہی ہے اور یہ اجتماعی طاقت کی دستاویز بن رہی ہے ۔وزیراعظم نے کہا کہ آج کے ‘من کی بات’ میں ہم نے سنا کہ کس طرح ہمارا ہندوستان تنوع میں اتحاد کے ساتھ آگے بڑھ رہا ہے ۔ کھیل ہو یا سائنس، صحت ہو یا تعلیم، ہندوستان ہر شعبے میں نئی بلندیوں کو چھو رہا ہے ۔ ہم نے ایک خاندان کی حیثیت سے مل کر ہر چیلنج کا سامنا کیا اور نئی کامیابیاں حاصل کیں۔ 2014 سے اب تک من کی بات کی 116 اقساط میں میں نے دیکھا کہ من کی بات ملک کی اجتماعی طاقت کا زندہ دستاویز بن گیا ہے ۔ عوام نے اس پروگرام کو اپنایا ہے اور اسے اپنا بنایا ہے ۔ ہر مہینے اپنے خیالات اور کوششوں کا اشتراک کرتے ہیں۔ مودی نے کہا کہ کبھی میں کسی نوجوان جدت طراز کی کامیابیوں سے متاثر ہوتا تھا اور کبھی مجھے اپنی بیٹی کی کامیابیوں پر فخر ہوتا ہے ۔ یہ آپ کی شرکت ہے جو ملک کے کونے کونے سے مثبت توانائی کو اکٹھا کرتی ہے ۔من کی بات اس مثبت توانائی کو بڑھانے کا پلیٹ فارم بن گیا ، اور اب، 2025 آ رہا ہے ۔ آئندہ سال میں ‘ من کی بات ’ کے ذریعے ہم مزید تحریک دینے کی کوششوں کو شیئر کریں گے ۔ مجھے یقین ہے کہ ہم وطنوں کی مثبت سوچ اور جدت طرازی کے جذبے سے ہندوستان نئی بلندیوں کو چھوئے گا۔ اپنے آس پاس کی انوکھی کوششوں کو من کی بات کے ساتھ بانٹتے رہیں۔ میں جانتا ہوں کہ آئندہ سال من کی بات کی ہر قسط میں ہمارے پاس ایک دوسرے کے ساتھ شیئر کرنے بہت کچھ ہوگا۔ آپ سبھی کو 2025 کی بہت مبارکباد۔ صحت مند رہیں، خوش رہیں، فٹ انڈیا موومنٹ میں شامل ہوں، اپنے آپ کو بھی فٹ رکھیں۔
مودی نے ہندوستانی سنیما کے عظیم فنکارو ںکو یاد کیا
نئی دہلی: وزیر اعظم نریندر مودی نے تفریحی دنیا کے چمکتے ستاروں راج کپور، محمد رفیع، تپن سنہا اور اکینینی ناگیشور راؤ گارو کو یاد کرتے ہوئے کہا کہ ان شخصیات نے ہندوستانی سنیما کو عالمی سطح پر شناخت دلائی۔ مودی نے کہا کہ سال 2024 میں ہم فلم انڈسٹری کی کئی عظیم شخصیات کی 100 ویں سالگرہ منا رہے ہیں۔ ان شخصیات نے ہندوستانی سنیما کو عالمی سطح پر پہچان دلائی۔ انہوں نے کہا کہ راج کپور جی نے فلموں کے ذریعے ہندوستان کی سافٹ پاور کو دنیا کے سامنے متعارف کرایا۔ رفیع صاحب کی آواز میں وہ جادو تھا جس نے ہر دل کو چھو لیا۔ ان کی آواز حیرت انگیز تھی۔ عقیدت مندانہ گانے ہوں یا رومانوی گیت، یا درد بھرے گانے ہوں، انھوں نے اپنی آواز سے ہر جذبات کو زندہ کیا۔ ایک آرٹسٹ کی حیثیت سے ان کی عظمت کا اندازہ اس بات سے لگایا جا سکتا ہے کہ آج بھی نوجوان نسل اسی جوش و خروش سے ان کے گانے سنتی ہے – یہ لازوال فن کی پہچان ہے ۔ اکنینی ناگیشور راؤ گارو تیلگو سنیما کو نئی بلندیوں پر لے گئے ہیں۔ ان کی فلموں نے ہندوستانی روایات اور اقدار کو بہت اچھی طرح سے پیش کیا۔ تپن سنہا کی فلموں نے سماج کو ایک نیا وژن دیا۔ ان کی فلمیں سماجی شعور اور قومی اتحاد کا پیغام دیتی تھیں۔ ان مشہور شخصیات کی زندگی ہماری پوری فلم انڈسٹری کے لیے ایک تحریک ہے ۔مسٹر مودی نے من کی بات پروگرام میں مزید کہا کہ میں آپ کو ایک اور اچھی خبر دینا چاہتا ہوں۔ ہندوستان کے تخلیقی ٹیلنٹ کو دنیا کے سامنے رکھنے کا ایک بہت بڑا موقع ہے ۔ اگلے سال پہلی بار ہمارے ملک میں ورلڈ آڈیو ویژول انٹرٹینمنٹ سمٹ یعنی ویوز سمٹ کا انعقاد ہونے جا رہا ہے ۔ آپ سبھی نے ڈیووس کے بارے میں ضرور سنا ہوگا جہاں دنیا کے بڑے معاشی ادارے جمع ہوتے ہیں۔ اسی طرح ویوز سمٹ میں دنیا بھر سے میڈیا اور انٹرٹینمنٹ انڈسٹری کے قدآور افراد آئیں گے ، تخلیقی دنیا کے لوگ ہندوستان آئیں گے ۔