کسان دہشت گرد یا غدار نہیں ، ہندوستان کا دل ہیں ،وہی دن اچھا جس دن پٹرول اورڈیزل کی قیمتوں میں اضافہ نہ ہو
لکھنو:کانگریس جنرل سکریٹری پرینکا گاندھی نے وزیراعظم نریندر مودی کا قدیم کہانیوں کے ’’گھمنڈی راجہ‘‘ کے کردار سے تقابل کیا اور کہا کہ وہ یہ سمجھنے سے قاصر ہیں کہ جوان جس نے ملک کی حفاظت کی ، وہ بھی کسان کا بیٹا ہے۔گھمنڈی راجہ خود کو اپنے محل تک ہی محدود رکھتا ہے۔ عوام اس کے سامنے سچائی بیان کرنے سے ڈرتے ہیں۔ ہمارے وزیراعظم اسی طرح کے ایک ضدی راجہ بن گئے ہیں۔پرینکا گاندھی نے آج مظفر نگر کے بگھرا میں کسان مہا پنچایت میں حصہ لیا جہاں عوام کا زبردست ہجوم تھا۔ عوام نے نہ صرف پرینکا گاندھی کی تقریر کو غور سے سنا بلکہ مودی حکومت کے خلاف نعرے لگاکر ہمت افزائی کی۔ پرینکا نے کہا کہ کسانوں کو ملک کا غدار اور دہشت گرد قرار دیا جارہا ہے ۔ پارلیمنٹ میں وزیراعظم نریندر مودی نے کسان تحریک کا مذاق اڑایا اور کسانوں کو آندولن جیوی کہا ۔ پرینکا نے کہا کہ کسان نہ تو غدار ہیں اور نہ ہی دہشت گرد، یہ تو ہندوستان کا دل ہیں۔ اس دل کی دھڑکن سے ہی ملک زندہ رہتا ہے۔ پٹرول ڈیزل کی بڑھتی قیمتوں کے سلسلے میں مرکزی کی نریندر مودی حکومت پر طنز کرتے ہوئے کہا کہ بی جے پی حکومت کو ہفتے کے اس دن کا نام’اچھا دن‘رکھ دینا چاہئے جس دن ڈیزل۔پٹرول کی قیمتوں میں اضافہ نہ ہو۔ پرینکا نے ہفتہ کو فیس بک وال پر لکھا‘ بی جے پی حکومت کو ہفتے کے اُس دن کا نام ’اچھا دن‘رکھ دینا چاہئے جس دن ڈیزل۔پٹرول کی قیمتوں میں اضافہ نہ ہو کیونکہ مہنگائی کی مار کی وجہ سے باقی دن تو عوام کیلئے ’مہنگے دن‘ ہیں۔انہوں نے کہا کہ مودی حکومت صنعت کاروں اور دولت مند افراد کو منافع پہنچانے کی نیت سے بھاری ٹیکس لگا کر پٹرول۔ڈیزل کے داموں میں تو ہر روز اضافہ کررہی ہے مگر کسانوں کو ان کی پیداوار کی قیمت دینے میں حکومت کترارہی ہے ۔کانگریس جنرل سکریٹری نے کہا‘ کالے زرعی قوانین کے خلاف کسان بہنوں،بھائیوں کی جدوجہد ان کی روزی روٹی سے جڑی ہوئی جدوجہد ہے۔ بی جے پی حکومت اپنے سرمایہ دوستوں کی تجوریاں بھرنے کے لئے بھاری ٹیکس لگا کر پٹرول۔ڈیزل کی قیمتیں تو ہر روز بڑھا رہی ہے لیکن کسانوں کو ان کی فصل کی قیمتیں نہیں دے رہی ہے ۔انہوں نے الزام عائد کیا کہ کسانوں کے حقوق ختم ہوگئے کیونکہ حکومت نے اپنے دو تین دوستوں کو پورا ملک فروخت کردیا ہے۔ اسی طرح وہ کسانوں ، ان کی اراضیات اور ان کی آمدنی بھی اپنے دولت مند دوستوں کو بیچ دینا چاہتی ہے۔ بی جے پی حکومت نے ڈیزل پر ٹیکس عائد کرتے ہوئے گزشتہ سال 3.5 لاکھ کروڑ روپئے کی آمدنی حاصل کی ہے۔ انہوں نے حکومت سے سوال کیا کہ وہ خطیر رقم کہاں گئی۔ پرینکا نے یہ بھی الزام لگایا کہ کسانوں کی کوئی سنوائی نہیں کررہا ہے۔