بیشتر ریاستیں برابر کی ذمہ دار۔ ایک روز میں 49,310 کیسوں کا نیا ریکارڈ۔ متاثرین 12.87 لاکھ
نئی دہلی: مودی حکومت 6 سال قبل عوام سے بلند بانگ دعووؤں کے ساتھ تشکیل پائی لیکن ایک میعاد اور ایک سال گزرجانے کے بعد غریب لوگ مزید غریب ہوگئے ، معیشت بدحال ہوگئی ۔ مختصر یہ کہ کسی بھی شعبہ میں مودی حکومت کا کوئی کارنامہ نظر نہیں آیا ۔ تاہم اب عالمی وباء کورونا وائرس کے معاملہ میں ہندوستان تیزی سے نمبر 2 ملک بننے گامزن ہے ۔ چین سے یہ وائرس شروع ہوا لیکن سب سے زیادہ متاثرین امریکہ میں ہے ، دوسرے نمبر پر برازیل اور تیسرے نمبر پر ہندوستان ہے ۔ انڈیا میں اب روزانہ لگ بھگ 50 ہزار نئے کورونا مریضوں کا اضافہ ہورہا ہے ۔ چنانچہ مودی حکومت میں کچھ اور نہ سہی کورونا وائرس میں ملک بڑی تیزی سے آگے بڑھ رہا ہے ۔بلاشبہ اس کیلئے صرف مرکز نہیں بلکہ بیشتر ریاستیں مساوی طور پر ذمہ دار ہیں۔ ملک میں خوفناک عالمی وبا کورونا وائرس کے گزشتہ 24 گھنٹوں کے دوران ریکارڈ 49,310 نئے کیسز رپورٹ ہوئے ، حالانکہ راحت کی بات یہ ہے کہ اسی دوران سب سے زیادہ 34,602 مریض شفایاب بھی ہوئے ہیں۔مرکزی وزارت صحت کی جانب سے جمعہ کو جاری تازہ ترین اعدادوشمار کے مطابق وائرس سے شفایاب ہونے والے افراد کی تعداد 8,17,209 ہوگئی ۔ ملک میں گذشتہ 24 گھنٹوں کے دوران 34,602 مریض کورونا وائرس سے ٹھیک ہوئے ہیں اور اسی عرصہ کے دوران وائرس کے ریکارڈ 49,310 نئے کیسز سے متاثرہ افراد کی مجموعی تعداد 12,87,945 ہوگئی اور 740مریضوں کی اموات کے ساتھ ہلاک شدگان کی مجموعی تعداد بڑھ کر 30,601 ہوگئی۔ اس وقت ملک میں کوروناوائرس کے 4,26,167 فعال کیسز ہیں۔مختلف ریاستوں میں گذشتہ 24 گھنٹوں کے دوران صورتحال پر نظر ڈالیں تو سب سے متاثرہ مہاراشٹر میں وائرس کے 9,895 نئے کیسز رپورٹ ہوئے اور 298 افراد کی موت ہوگئی۔ یہاں متاثرہ افراد کی تعداد 3,47,502 ہے اور ہلاک ہونے والوں کی تعداد 12,854 ، جبکہ 1,94,253 افراد اس وبا سے شفایاب ہوچکے ہیں۔
وائرس سے متاثر ہونے کے معاملہ میں دوسرے نمبر پر براجمان تمل ناڈو میں اس عرصہ کے دوران 6,472 نئے کیسز رپورٹ ہوئے اور 88 افراد کی موت ہوگئی ، جس سے متاثرہ افراد کی تعداد 1,92,964 اور ہلاکتوں کی تعداد 3,232 ہوگئی۔ ریاست میں 1,36,793 افراد کو مختلف اسپتالوں سے فارغ کیا گیا ہے ۔قومی دارالحکومت دہلی میں کورونا وائرس کی حالت اب کچھ کنٹرول میں ہے اور یہاں وائرس کے کیسز میں اضافے کی شرح میں قدرے کمی واقع ہوئی ہے ۔ دارالحکومت میں اب تک 1,27,364 افراد کورونا سے متاثر ہوئے ہیں اور اموات کی تعداد بڑھ کر 3745 ہوگئی ہے جبکہ اب تک 1,09,065 مریضوں کو مختلف اسپتالوں سے چھٹی دے دی گئی ہے۔ جنوبی ہندوستان کی ریاست کرناٹک ، متاثرہ افراد کی تعداد کے لحاظ سے چوتھے نمبر پر پہنچ گیا ہے ۔ ریاست میں 80,863 افراد متاثر ہوئے ہیں اور اس وبا سے 1616 افراد لقمہ اجل بن چکے ہیں ، جبکہ 29,310افراد شفایاب ہوئے ہیں۔آندھرا پردیش میں متاثرہ افراد کی تعداد میں تیزی سے اضافے کی وجہ سے اس نے سب سے زیادہ متاثرہ ریاستوں کی فہرست میں اترپردیش اور گجرات کو پیچھے چھوڑ دیا ہے ۔ ریاست میں 72,711افراد متاثر ہوئے ہیں اور اموات کی تعداد 884 ہوگئی ہے ، جبکہ 37,555 افراد شفایاب ہوئے ہیں۔آبادی کے لحاظ سے ملک کی سب سے بڑی ریاست اتر پردیش ، کورونا وائرس کے کیسزکے معاملے میں گجرات کو پیچھے چھوڑ کر چھٹے نمبر پر آگیا ہے ۔ ریاست میں اب تک 58,104 کیسز رپورٹ ہوئے ہیں اور اس وبا کی وجہ سے 1289افراد لقمہ اجل بن چکے ہیں جبکہ 35,803مریض ٹھیک ہوگئے ہیں۔ملک کی مغربی ریاست گجرات کورونا وائرس کے کیسز کے معاملہ میں ساتویں نمبر پر آگیا ہے ، لیکن اموات کی تعداد کے لحاظ سے یہ مہاراشٹر ، دہلی اور تمل ناڈو کے بعد چوتھے نمبر پر ہے ۔ گجرات میں 52,477افراد اس وائرس سے متاثر ہوئے ہیں اور 2,252افراد اب تک ہلاک ہوچکے ہیں۔ ریاست میں 37,978افراد اس جان لیوا وبا سے شفایاب ہوئے ہیں۔مغربی بنگال میں51,757افراد کورونا وائرس سے متاثر ہوئے ہیں اور 1255 افراد فوت ہوگئے۔
جبکہ اب تک 31,656 افراد شفایاب ہوئے ہیں۔ایک اور جنوبی ہندوستانی ریاست تلنگانہ میں کورونا وائرس کے کیسز بہت تیزی سے بڑھ رہے ہیں۔ اس ریاست میں کورونا متاثرین کی تعداد 50826 تک پہنچ چکی ہے اور 447افراد لقمہ اجل بن چکے ہیں جبکہ اب تک 39,327 افراد اس وبا سے شفایاب ہوئے ہیں۔راجستھان میں کورونا وائرس متاثرین کی تعداد 33,220تک جا پہنچی ہے اور اب تک 594 افراد ہلاک ہوچکے ہیں ، جبکہ 23،815 افراد مکمل طور پر صحت یاب ہوئے ہیں۔