نئی دہلی: کانگریس لیڈر راہول گاندھی نے آج وزیر اعظم نریندر مودی کو نشانہ بناتے ہوئے کہا کہ وہ اپنے دوستوں کیلئے سب کچھ کر سکتے ہیں لیکن کسانوں کی بھلائی کیلئے کوئی قدم اٹھانے کو تیار نہیں ہیں۔ راہول گاندھی نے ٹویٹ کرتے ہوئے کہاکہ کیا مودی دوستوں کا قرض معاف کر دیا گیا، ہاں؟ کیا مودی دوستوں کو کارپوریٹ ٹیکس میں چھوٹ ملی، ہاں؟ کیا مودی کے دوستوں کو سستی زمینیں دی گئیں؟ ہاں۔ انہوں نے کہا کہ مودی اپنے دوستوں کے مفاد میں ہر قدم اٹھانے کو تیار ہیں لیکن انہیں کسانوں کی کوئی فکر نہیں ہے اور کسانوں سے کئے گئے وعدے پورے نہیں ہوئے ہیں۔ راہول نے استفسار کیا کہ آیا کسانوں کی آمدنی دوگنی ہو گئی ہے ؟نہیں۔
کیا کسانوں کے قرضے معاف کر دیے گئے ؟ چند ایک کے درمیان ہندوستان کے وسائل کو ضائع کرنے کی ‘متر پالیسی’ مودی کی ان لوگوں کے ساتھ دھوکہ ہے جنہوں نے ہندوستان بنایا۔کسانوں کے مفادات کیلئے کانگریس کی وابستگی کا اظہار کرتے ہوئے راہول گاندھی نے کہاکہ “کانگریس ہر کسان، ہر مزدور اور آخری صف میں کھڑے غریبوں کیلئے منصفانہ پالیسیاں بنانے کیلئے پابند عہد ہے ۔”