امریکی صدر ٹرمپ کا ریمارک‘فوری ستائش بھی کی‘روس سے تیل نہ خریدنے مودی کے تیقن کا دعویٰ
واشنگٹن ۔16؍اکتوبر ( ایجنسیز )امریکی صدر ڈونالڈ ٹرمپ نے جمعرات کو کہا کہ وزیر اعظم ہندنریندر مودی ٹرمپ سے محبت کرتے ہیں لیکن فوری طور پر
واضح کیا کہ وہ مودی کے سیاسی کیریئر کو تباہ کرنا نہیں چاہتے۔ ٹرمپ نے یہ بھی دعویٰ کیا کہ مودی نے انہیں یقین دلایا ہیکہ ہندوستان روسی تیل خریدنا بند کردے گا حالانکہ انہوں نے نوٹ کیا کہ اس عمل میں وقت لگے گا۔امریکی صدر نے وائٹ ہاؤس میں جمعرات کو میڈیا سے بات کرتے ہوئے وزیر اعظم نریندر مودی کے بارے میں ایک عجیب و غریب تبصرہ کیا اور فوری طور پر وضاحت کی ضرورت بھی محسوس کی۔ امریکی صدر نے کہا کہ وہ (پی ایم مودی) ٹرمپ سے محبت کرتے ہیں۔ اس کے بعد امریکی صدر نے فوری طور پر واضح کیا کہ لفظ “محبت” کو کسی اور طرح سے نہ لیں کیونکہ وہ ہندوستانی وزیر اعظم کے سیاسی کیریئر کو تباہ نہیں کرنا چاہتے۔وہ ٹرمپ سے محبت کرتے ہیں اورمودی ایک عظیم آدمی ہیں۔ ٹرمپ نے مزید کہا کہ ہندوستان ایک ناقابل یقین ملک ہے اور وزیر اعظم مودی وقت کا تجربہ کرنے والے لیڈر ہیں۔ٹرمپ کے اس دعوے کے چند گھنٹے بعد روس نے اپنی ردعمل دیا ہے ۔ ٹرمپ نے کل ایک بڑا دعویٰ کرتے ہوئے کہا کہ وزیر اعظم مودی نے انہیں یقین دلایا ہے کہ ہندوستان روسی تیل خریدنا بند کر دے گا۔ یہ بیان اس وقت آیا جب امریکہ نے متعدد مواقع پر روس سے تیل خریدنے پر ہندوستان کو تنقید کا نشانہ بنایا۔ٹرمپ نے کہا کہ انہوں نے مجھے یقین دلایا ہے کہ روس سے کوئی تیل نہیں خریدا جائے گا۔ ٹرمپ نے اسے ایک بڑا قدم قرار دیتے ہوئے کہا کہ یہ یوکرین جنگ پر روس کو تنہا کرنے کی ان کی کوششوں کا حصہ ہے۔ اب ہمیں چین سے بھی ایسا کرنے کو کہنا ہے۔ امریکی صدر ٹرمپ نے یہ بھی کہا کہ توانائی پالیسی پر اختلافات کے باوجود وزیر اعظم مودی امریکہ کے قریبی اتحادی ہیں۔ جب ان سے پوچھا گیا کہ کیا وہ چین کے ساتھ کشیدگی کے درمیان ہندوستان کو ایک قابل اعتماد پارٹنر سمجھتے ہیں ٹرمپ نے کہا کہ وہ (وزیر اعظم نریندر مودی) میرے دوست ہیں۔ ہمارے بہت اچھے تعلقات ہیں۔امریکہ کے نامزد سفیر سرجیو گور اور وزیر اعظم مودی کے درمیان ملاقات کے بارے میں پوچھے گئے سوال کے جواب میں ٹرمپ نے کہا کہ امریکہ کے نامزد سفیر سرجیو گور اور وزیر اعظم مودی کے درمیان بہت اچھی ملاقات ہوئی۔ سرجیو نے صدر ٹرمپ کو بتایا کہ وزیر اعظم مودی ٹرمپ کو پسند کرتے ہیں۔جب سے مغربی ممالک نے 2022 میں روس سے توانائی کی درآمدات کو روکنا شروع کیا ہے ہندوستان ماسکو کا سب سے بڑا خریدار بن کر ابھرا ہے۔ تجارتی اعداد و شمار کے مطابق روسی خام تیل اب ہندوستان کی کل تیل کی درآمدات کا تقریباً ایک تہائی حصہ ہے۔مغربی پابندیوں کے باوجود ہندوستان کی جانب سے روس سے پیٹرولیم مصنوعات کی خریداری جاری رکھنا ایک بڑا مسئلہ بن گیا ہے جس کے نتیجے میں نئی دہلی اور واشنگٹن کے درمیان تعلقات میں شدید کشیدگی آئی ہے۔ امریکی صدر روس سے تیل کی خریداری بند کرنے کیلئے ہندوستان پر مسلسل دباؤ ڈال رہے ہیں اور ہندوستانی درآمدات پر بھاری ٹیرف عائد کرنے کی دھمکیاں دے رہے ہیں ۔