کانگریس حکومت نے کئی دہائیوں تک حکومت کی لیکن ایسے تبصرہ کارروائی کی کوئی مثال نہیں ملتی، وزیراعلیٰ کی میڈیا سے بات چیت
بیلگاوی (کرناٹک): کرناٹک کے وزیر اعلیٰ سدارمیا نے وزیر اعظم نریندر مودی کے حالیہ دعوے کہ اگر کانگریس اقتدار میں آئی تو خواتین کا منگل سوتر چھین لیا جائے گا،کو مسترد کرتے ہوئے کہا اسے ووٹ حاصل کرنے کے لیے استعمال کیا گیا تھا۔ یہ سیاسی طور پر من گھڑت کہانی ہے ۔چہارشنبہ کو یہاں نامہ نگاروں سے بات کرتے ہوئے سدارمیا نے مودی کے دعوؤں کی تردید کی اور کہا کہ دہائیوں پر محیط کانگریس کے دور حکومت میں خواتین کے خلاف ایسی کارروائی کی کوئی مثال نہیں ملتی۔ انہوں نے مودی کی ایمانداری پر سوال اٹھاتے ہوئے اپنے دور اقتدار میں ادھورے وعدوں اور ادھورے عزائم کا حوالہ دیا۔وزیر اعظم جیسے ذمہ دار عہدے پر فائز رہتے ہوئے مودی کے اس طرح کے بیانات پر مایوسی کا اظہار کرتے ہوئے انہوں نے کہاکہکانگریس پارٹی نے پانچ دہائیوں تک ملک پر حکومت کی۔ اس نے کبھی خواتین سے منگل سوتر چھیننے کا سہارا نہیں لیا۔ وزیر اعظم مودی ایسے جھوٹ کا سہارا کیوں لے رہے ہیں؟۔کرناٹک حکومت پر مودی کی تنقید کے بارے میں پوچھے جانے پر، وزیر اعلیٰ نے وزیر اعظم پر دھوکہ دہی کا الزام لگایا اور ان مثالوں کی طرف اشارہ کیا جہاں مرکزی حکومت ریاست میں مختلف معاملات میں کارروائی کرنے میں ناکام رہی ہے ۔ مودی کے دعوؤں میں تضادات کو اجاگر کرتے ہوئے سدارمیا نے کہاکہ مرکزی حکومت نے منی پور میں تشدد کے سلسلے میں کیا اقدامات کیے ہیں؟ اقلیتوں کے لیے ریزرویشن کا وعدہ 30 سال سے کیا جارہا ہے ۔نیشنل ڈیموکریٹک الائنس (این ڈی اے ) کے لوک سبھا امیدوار پرجول ریونا کے جنسی ہراسانی کے معاملے پر تشویش کا جواب دیتے ہوئے ، انہوں نے یقین دلایا کہ ریاستی حکومت نے اس معاملے کی تحقیقات کے لیے ایک خصوصی تحقیقاتی ٹیم (ایس آئی ٹی) تشکیل دی ہے ۔ انہوں نے کہا کہ ایس آئی ٹی کی تحقیقات کے نتائج کی بنیاد پر مناسب کارروائی کی جائے گی۔