نئی دہلی: وزیر اعظم نریندر مودی نے بدھ کو صدر دروپدی مرمو سے ملاقات کرکے انہیں پاکستان اور پاکستان کے زیر قبضہ کشمیر میں دہشت گردی کے کیمپوں کو تباہ کرنے کے لئے ہندوستانی افواج کے ذریعہ شروع کئے گئے آپریشن سندور کے بارے میں بتایا۔ چہارشنبہ کو سوشل میڈیا پلیٹ فارم ایکس پر یہ اطلاع دیتے ہوئے راشٹرپتی بھون سکریٹریٹ نے کہاکہ وزیر اعظم نریندر مودی نے راشٹرپتی بھون میں صدر دروپدی مرمو سے ملاقات کی اور انہیں آپریشن سندورکے بارے میں بتایا۔ قبل ازیں وزیر اعظم نے مرکزی کابینہ کی میٹنگ کی صدارت کی اور مرکزی کابینہ کی سیکورٹی امور کمیٹی کی میٹنگ میں بھی اس معاملے پر تبادلہ خیال کیا۔
آپریشن سندور سے انصاف کا آغاز : آر ایس ایس
ممبئی : راشٹریہ سویم سیوک سنگھ (آر ایس ایس) نے چہارشنبہ کے روز پہلگام میں دہشت گردانہ حملے کے متاثرین کیلئے کی جانے والی کارروائی ’آپریشن سندور‘کو انصاف کی شروعات قرار دیتے ہوئے اس کی بھرپور ستائش کی ہے ۔ آر ایس ایس کے قومی میڈیا اور تشہیر کے محکمے کے سربراہ سنیل امبیکر نے چہارشنبہ کو سوشل میڈیا پر جاری ایک پیغام میں کہا کہ پہلگام کے متاثرین کیلئے انصاف کی شروعات ’آپریشن سندور‘، انصاف نے کام کیا، جئے ہند، مدر انڈیا زندہ باد۔ چہارشنبہ کے دن، ہندوستانی مسلح افواج نے 22 اپریل کو پہلگام میں پیش آئے دہشت گردانہ حملے کے جواب میں پاکستان کے اندر دہشت گردوں کے نو ٹھکانوں کو نشانہ بنایا۔22 اپریل کو پہلگام حملے میں 26 شہری جاں بحق ہوئے تھے۔