نئی دہلی، 24 فروری (یو این آئی) وزیر اعظم نریندر مودی چہارشنبہ کے روز اسرائیل کے دو روزہ دورے پر روانہ ہوں گے ، جہاں وہ وزیر اعظم بنیامن نتن یاہو سے ملاقات کریں گے اور مختلف شعبوں میں تعاون بڑھانے کے امکانات پر تبادلۂ خیال کریں گے ۔ وزیر اعظم اسرائیل کے صدر اسحاق ہرزوگ سے بھی خیر سگالی ملاقات کریں گے ۔ وزارت خارجہ نے منگل کو بتایا کہ وزیر اعظم مودی، وزیر اعظم نتن یاہو کی دعوت پر 25 اور 26 فروری کو اسرائیل کے سرکاری دورے پر جائیں گے ۔ یہ وزیر اعظم کا اسرائیل کا دوسرا دورہ ہوگا۔ اس دورے کے دوران مودی وزیر اعظم نتن یاہو سے ملاقات کریں گے ۔
دونوں رہنما ہند-اسرائیل اسٹریٹجک شراکت داری میں ہونے والی اہم پیش رفت کا جائزہ لیں گے اور سائنس و ٹیکنالوجی، اختراعات، دفاع و سلامتی، زراعت، آبی انتظام، تجارت و معیشت اور عوامی رابطوں سمیت مختلف شعبوں میں تعاون کے امکانات پر بات چیت کریں گے ۔ دونوں رہنما علاقائی اور عالمی اہمیت کے حامل مسائل پر بھی خیالات کا تبادلہ کریں گے ۔ وزیر اعظم مودی اسرائیل کے صدر ہرزوگ سے بھی رسمی ملاقات کریں گے ۔ یہ دورہ دونوں ممالک کے درمیان گہرے اور طویل مدتی اسٹریٹجک تعلقات کی توثیق کرے گا اور مشترکہ چیلنجوں کا جائزہ لینے کے ساتھ ساتھ دو طاقتور جمہوریتوں کے درمیان مضبوط اور دور اندیش شراکت داری کو آگے بڑھانے کا موقع فراہم کرے گا۔
