ایم پی۔ایم ایل اے عدالت کے حکم پر روک لگائی
پٹنہ : کانگریس لیڈر راہول گاندھی کو پٹنہ ہائی کورٹ سے بڑی راحت ملی ہے۔ مودی کنیت کیس میں پٹنہ کی ایم پی۔ایم ایل اے عدالت نے راہول گاندھی کو منگل 25 اپریل کو شخصی طور پر پیش ہونے کا حکم دیا تھا۔ راہول گاندھی کی جانب سے پٹنہ ہائی کورٹ میں اس کیلئے استثنیٰ کی اپیل کی گئی تھی۔ پٹنہ ہائی کورٹ نے عدالت کے حکم پر روک لگاتے ہوئے 15 مئی کی تاریخ دی ہے۔پیر کو اس معاملے کی سماعت کرتے ہوئے پٹنہ ہائی کورٹ کے جسٹس سندیپ کمار کی سنگل بنچ نے کیس کی اگلی سماعت 15 مئی کو مقرر کی ہے۔ پٹنہ کی عدالت نے راہول گاندھی کو مودی کنیت کے حوالے سے دیئے گئے بیان پر 25 اپریل کو عدالت میں حاضر ہونے کی ہدایت دی تھی۔ ہائی کورٹ کے حکم امتناعی کے بعد اب انہیں 25 اپریل کو ایم پی-ایم ایل اے کورٹ میں پیش نہیں ہونا پڑے گا۔بتا دیں کہ راہول گاندھی کو سورت کی ایک عدالت نے مودی کنیت کیس میں ہتک عزت کے چار سال پرانے معاملے میں دو سال کی سزا سنائی تھی۔ عدالت کے اس فیصلے کے بعد سکریٹریٹ نے ان کی پارلیمنٹ کی رکنیت بھی منسوخ کر دی تھی۔ قابل ذکر بات یہ ہے کہ 2019 کے لوک سبھا انتخابات کے دوران راہول گاندھی نے کرناٹک کے کولار میں ایک تقریر کی تھی جس میں انہوں نے مودی کنیت کے حوالے سے بیان دیا تھا۔
