وزیر خارجہ جے شنکر کا اسرائیلی ہم منصب کو فون
نئی دہلی:وزیر اعظم نریندر مودی نے ہفتہ کو برطانوی وزیر اعظم رشی سنک کو ٹیلی فون کیا اورمغربی ایشیا کی بگڑتی ہوئی صورتحال، دہشت گردی، شہریوں کی ہلاکت پر گہری تشویش کا اظہار کرنے کے ساتھ علاقائی امن و سلامتی، استحکام اور انسانی امداد جاری رکھنے کی ضرورت پر اتفاق کیا۔وزارت خارجہ کے مطابق دونوں لیڈروں نے تجارت، سرمایہ کاری، ابھرتی ہوئی ٹیکنالوجی، دفاع، سلامتی، صحت اور دیگر شعبوں سمیت دو طرفہ جامع اسٹریٹجک شراکت داری کو مضبوط بنانے کے لیے کوششیں جاری رکھنے کے عزم کا اعادہ کیا۔دونوں رہنماؤں نے مغربی ایشیا میں رونما ہونے والی پیش رفت اور اسرائیل اور حماس کے درمیان تنازعات پر تبادلہ خیال کیا۔ مودی نے وزیر اعظم سنک کو ان کی میعاد کے ایک سال کی تکمیل پر دیوالی کی مبارکباد دی۔ دونوں رہنماؤں نے رابطہ میں رہنے پر بھی اتفاق کیا۔دوسری طرف غزہ میں حماس کے خلاف کارروائی کے درمیان وزیر خارجہ ایس جے شنکر نے ہفتے کے روز اپنے اسرائیلی ہم منصب ایلی کوہن کے ساتھ ٹیلی فون پر بات چیت کی جس میں دہشت گردی کا مقابلہ کرنے بین الاقوامی انسانی قانون کی پابندی اور دو ریاستی حل کیلئے ہندوستان کے عزم کا اعادہ کیا گیا۔