آئندہ ماہ اپنی 75ویں سالگرہ سے قبل خوش کرنے کی مایوس کن کوشش کے سوا کچھ نہیں : کانگریس
نئی دہلی، 15 اگست (یواین آئی) کانگریس نے یوم آزادی پر لال قلعہ کی فصیل سے وزیر اعظم نریندر مودی کی تقریر کو انتہائی تشویشناک قرار دیتے ہوئے کہا ہے کہ قوم سے اپنے خطاب میں راشٹریہ سویم سیوک سنگھ (آر ایس ایس) کا نام لینا ایک سیکولر ریاست کی روح کی خلاف ورزی اور سنگھ پریوار کو خوش کرنے کی کوشش ہے ۔کانگریس کے کمیونیکیشن ڈپارٹمنٹ کے سربراہ جے رام رمیش نے جمعہ کو یہاں کہا کہ یوم آزادی پر مودی کی تقریر کا سب سے تشویشناک پہلو لال قلعہ کی فصیل سے آر ایس ایس کا نام لینا تھا اور یہ ایک آئینی، سیکولر جمہوریہ کی روح کی کھلی خلاف ورزی ہے۔ انہوں نے اسے مودی کی آر ایس ایس کو خوش کرنے کی کوشش قرار دیا اور کہا کہ یہ مودی کی طرف سے تنظیم کو آئندہ ماہ اپنی 75ویں سالگرہ سے قبل خوش کرنے کی مایوس کن کوشش کے سوا کچھ نہیں ہے ۔ انہوں نے کہا کہ وزیر اعظم جو گزشتہ سال 4 جون سے فیصلہ کن طور پر کمزور ہو چکے ہیں، اب مکمل طور پر موہن بھاگوت کے رحم و کرم پر منحصر ہیں تاکہ ستمبر کے بعد ان کی میعاد میں توسیع کی جا سکے ۔ یوم آزادی جیسے قومی موقع پر ذاتی اور تنظیمی فائدے کیلئے سیاست کرنا ہماری جمہوری اقدار کیلئے انتہائی نقصان دہ ہے ۔رمیش نے کہا کہ لال قلعہ سے مودی نے وکست بھارت، آتماز بھر بھارت اور سب کا ساتھ،سب کا وکاس جیسے نعروں کو دہرایا ہے جو وہ برسوں سے لگا رہے ہیں۔ ان کے نعروں کا اب تک کوئی نتیجہ نہیں نکلا۔ ‘میڈ ان انڈیا’ سیمی کنڈکٹر چپس کا وعدہ بڑے بڑے جھوٹ کے ساتھ بار بار کیا گیا اور ایسی باتیں کہنا مودی کی پہچان بن گیا ہے ۔ انہوں نے کہا کہ ہندوستان کا پہلا سیمی کنڈکٹر کمپلیکس چنڈی گڑھ میں 1980 کی دہائی کے اوائل میں ہی قائم کیا گیا تھا۔ کسانوں کے تحفظ کی بات کو کھوکھلا بتاتے ہوئے انہوں نے کہا کہ ان کی اپنی حکومت نے تین کالے زرعی قوانین کو نافذ کرنے کی کوشش کی تھی لیکن آج وہ ایم ایس پی کی قانونی ضمانت، لاگت پر 50 فیصد منافع کے ساتھ ایم ایس پی طے کرنے یا قرض کی معافی پر کوئی ٹھوس اعلان نہیں کر پا رہی ہے ۔ روزگار کی فراہمی پر صرف سطحی باتیں کی جارہی ہیں۔ اتحاد، شمولیت اور جمہوریت پر مودی کی تقریر کا حوالہ دیتے ہوئے انہوں نے کہا کہ مودی خود الیکشن کمیشن جیسے اداروں کے زوال کے ذمہ دار اور منصوبہ ساز رہے ہیں۔
آر ایس ایس ہیڈکوارٹر پر
یوم آزادی تقریب
ناگپور ، 15 اگست (یو این آئی)ملک کے 79ویں یوم آزادی کی مناسبت سے مہاراشٹرا کے ناگپور میں محل علاقے میں واقع راشٹریہ سویم سیوک سنگھ کے ہیڈکوارٹر میں آج پرچم کشائی کی تقریب منعقد ہوئی۔ اس موقع پر سرسنگھ چالک ڈاکٹر موہن بھاگوت کی غیر حاضری کے باعث ناگپور میٹروپولیٹن سنگھ چالک راجیش لویا نے قومی پرچم لہرایا۔ تقریب میں بڑی تعداد میں سنگھ کے پرچارک شریک ہوئے۔