نئی دہلی 11 ستمبر (یو این آئی) وزیراعظم نریندر مودی نے جمعرات کے روز آر ایس ایس سربراہ ڈاکٹر موہن بھاگوت کو ان کی سالگرہ پر مبارکباد دی۔ مودی نے ملک اور سماج کے تئیں بھاگوت کی خدمات کا ذکر کرتے ہوئے ان کی اچھی صحت اور عمردرازی کی دعا کی۔ سوشل میڈیا پر اپنے تہنیتی پیغام میں انہوں نے کہا کہ واسودھیوا کٹمبکم کے منتر سے متاثر موہن بھاگوت جی نے اپنی پوری زندگی مساوات اور بھائی چارے کے جذبے کو مضبوط کرنے کے لیے وقف کر دی ہے ۔انہوں نے کہا کہ موہن جی کی 75 ویں سالگرہ کے خاص موقع پر، جو ہمیشہ ماں بھارتی کی خدمت کے لیے تیار رہتے ہیں، میں نے ان کی متاثر کن شخصیت کے بارے میں اپنے جذبات کا اظہار کیا ہے ۔ میں ان کی لمبی اور صحت مند زندگی کی خواہش کرتا ہوں۔ ڈاکٹر موہن راؤ مدھوکر راؤ بھاگوت 11 ستمبر 1950 کو مہاراشٹر کے چندر پور نامی ایک چھوٹے سے شہر میں پیدا ہوئے تھے ۔
بھاگوت کو مودی کی سالگرہ کی مبارکباد، آر ایس ایس کو خوش کرنے کی کوشش:کانگریس
نئی دہلی، 11 ستمبر (یواین آئی) کانگریس نے کہا ہے کہ وزیر اعظم نریندر مودی نے راشٹریہ سویم سیوک (آر ایس ایس) کے سربراہ موہن بھاگوت کو ان کی سالگرہ پر مبارکباد دی لیکن ان کا یہ پیغام آر ایس ایس کو خوش کرنے کی کوشش لگتا ہے ۔ کانگریس کے کمیونیکیشن ڈپارٹمنٹ کے انچارج جے رام رمیش نے سوشل میڈیا پر کہا کہ وزیر اعظم نے آر ایس ایس کی قیادت کو خوش کرنے کی اپنی مایوس کن کوشش میں آج موہن بھاگوت کی 75ویں سالگرہ پر ایک مبالغہ آمیز خصوصی پیغام لکھا ہے ۔ رمیش نے لکھاکہ وزیر اعظم نے یاد کیا کہ 11 ستمبر 1893 کو سوامی وویکانند نے شکاگو میں اپنی لافانی تقریر کی تھی۔ وزیر اعظم نے یہ بھی یاد کیا کہ 11 ستمبر 2001 کو امریکہ میں القاعدہ کے دہشت گردانہ حملے ہوئے تھے لیکن حیرت کی بات نہیں ہے کہ وزیر اعظم نے اس بات کا ذکر نہیں کیا کہ 11 ستمبر 1906 کو مہاتما گاندھی نے جوہانسبرگ میں پہلی مرتبہ ستیہ گرہ کی اپیل کی تھی۔ اسی وقت دنیا نے پہلی مرتبہ اس انقلابی خیال کو سنا تھا۔
کانگریس لیڈر نے مودی پر حملہ کرتے ہوئے کہا کہ یقینا یہ توقع کرنا بہت زیادہ ہے کہ وزیر اعظم ستیہ گرہ کی اصل کو یاد رکھیں گے ، کیونکہ سچ لفظ سے وہ ناواقف ہیں۔