نئی دہلی۔ وزیراعظم نریندر مودی نے روس کے صدر ولادیمیر پوٹن سے آج ٹیلی فون پر بات چیت کی۔مودی نے بات چیت کے دوران دوسری عالمی جنگ میں جیت کی 75 ویں سالگرہ کے موقع پر روس میں منائی جارہی تقریب اور روس میں آئینی ترامیم پر ووٹ کے کامیاب اختتام کے لئے گرم جوشی سے مبارکباد دی۔وزیراعظم نے ماسکو میں منعقدہ فوجی پریڈ میں ہندوستانی فوجی دستے کی شرکت کا ذکر کرتے ہوئے اسے ہندوستان اور روس کے عوام کے بیچ مستقل دوستی کی علامت قرار دیا۔ دونوں رہنماوں نے کووڈ 19 کے منفی اثرات کو دور کرنے کے لئے دونوں ممالک کے ذریعہ کئے گئے اقدامات پر بات چیت کی اور کورونا کے بعد کی دنیا کے چیلنجوں سے مل کر مقابلہ کرنے کے لئے ہندوستان اور روس کے قریبی تعلقات کی اہمیت پر رضامندی ظاہر کی۔
